उन्हाळ्याचा कडाका वाढला! फलटणच्या बाजारात ‘गरिबांचा फ्रिज’ दाखल; आरोग्याच्या काळजीने बड्या घरातही माठाला पसंती

फलटण शहर व तालुक्यात उन्हाळ्याचा कडाका वाढू लागला असून, जागोजागी ‘गरिबांचा फ्रिज’ म्हणून ओळखले जाणारे माठ (डेरा) विक्रीसाठी दाखल झाले आहेत. फ्रिजचे पाणी टाळून आरोग्याची काळजी घेण्यासाठी यंदा बड्या घरातही माठाला मोठी मागणी आहे.

स्थैर्य, फलटण, दि. 12 मार्च : फलटण शहरासह तालुक्यात आता उन्हाळ्याची चाहूल चांगल्याच प्रमाणात जाणवू लागली आहे. वाढत्या तापमानामुळे उकाड्याने हैराण झालेल्या नागरिकांची पावले आता थंड पेयांकडे आणि पाणी थंड ठेवणाऱ्या पारंपरिक साधनांकडे वळू लागली आहेत. यातच ‘गरिबांचा फ्रिज’ म्हणून सर्वत्र ओळखला जाणारा माठ (डेरा) आता फलटण शहरात जागोजागी विक्रीसाठी मोठ्या प्रमाणावर उपलब्ध झाला आहे.

यंदा माठ महागले तरी मागणीत वाढ

उन्हाळ्याचा तडाखा वाढताच माठांची मागणीही बाजारात वाढली आहे. कुंभारवाड्यातून तसेच परगावाहून अनेक व्यावसायिक माठ विक्रीसाठी शहरात दाखल झाले आहेत. गतवर्षीच्या तुलनेत यंदा बाजारात माठ थोडे महाग झाले आहेत. माती आणि इंधनाच्या वाढलेल्या किमती तसेच वाहतूक खर्चामुळे माठांच्या दरात किंचित वाढ झाल्याचे विक्रेत्यांचे म्हणणे आहे. असे असले तरी, नागरिकांकडून यंदा माठांना चांगलीच मागणी दिसून येत आहे. रस्त्यांच्या कडेला आणि मुख्य बाजारपेठेत विविध आकारांचे, रंगांचे आणि आकर्षक नक्षीकाम केलेले माठ ग्राहकांचे लक्ष वेधून घेत आहेत.

आरोग्यासाठी आता ‘बड्या’ घरातही माठ दिमाखात

पूर्वी माठ हा केवळ गरिबांच्या घरातच असायचा, मात्र आता हे चित्र पूर्णपणे बदलले आहे. उन्हाळ्यात फ्रिजमधील अतिथंड पाणी प्यायल्याने सर्दी, खोकला, घशाचे आजार आणि इतर शारीरिक व्याधी उद्भवण्याचे प्रमाण मोठ्या प्रमाणावर वाढले आहे. डॉक्टरांकडूनही फ्रिजचे पाणी न पिण्याचा सल्ला दिला जातो. या आजारांपासून बचाव करण्यासाठी आणि आरोग्याची काळजी घेण्यासाठी आता उच्चभ्रू आणि श्रीमंत वर्गही माठातील नैसर्गिक थंड पाण्याला पसंती देत आहे. माठात पाणी नैसर्गिकरीत्या थंड होते आणि ते आरोग्यासाठी अत्यंत फायदेशीर असते. त्यामुळेच एकेकाळी केवळ गरिबांच्या झोपडीत दिसणारा हा ‘गरिबांचा फ्रिज’ आता बड्या लोकांच्या घरातही अत्यंत दिमाखात बसलेला पाहायला मिळत आहे.