सामान्यांचा ‘व्हॉईस’ दुबळा होऊ देऊ नका – ज्येष्ठ नेते शरद पवार

दैनिक स्थैर्य | दि. १९ नोव्हेंबर २०२३ | बारामती |
एकंदरीत आज देशातील माध्यमांची स्थिती बदलली आहे. पत्रकाराला स्वतःचे मत मांडायला, भूमिका घ्यायला वाव कमी आहे, असे वातावरण आहे. सत्य आणि योग्य असेल तर मांडा, पण कुणाच्या सूचनेवरून भूमिका ठरवू नका. सामान्यांच्या अपेक्षेचे ओझे पत्रकारितेवर आहे. हा जो ‘व्हॉईस’ आहे, तो दुबळा होऊ देऊ नका, असे आवाहन देशाचे ज्येष्ठ नेते शरदचंद्र पवार यांनी केले.

बारामती येथे शनिवार, दि. १८ नोव्हेंबर रोजी ‘व्हाईस ऑफ मीडिया’च्या राज्य अधिवेशन प्रसंगी शरद पवार बोलत होते. याप्रसंगी माजी मुख्यमंत्री सुशीलकुमार शिंदे, विरोधी पक्ष नेते विजय वड्डेटीवार व ज्येष्ठ पत्रकार आणि व्हाईस ऑफ मिडियाचे पदाधिकारी, प्रतिनिधी उपस्थित होते.

पत्रकारिता व साहित्याच्या माध्यमातून आपल्या लेखणीद्वारे आयुष्य झिजविणार्‍या सारस्वतांचा व्हॉईस ऑफ मीडियाच्या वतीने जीवन गौरव पुरस्कार देऊन सन्मान करण्यात आला. यासोबतच वेगवेगळ्या क्षेत्रात उल्लेखनीय सेवा देणार्‍यांचाही गौरव करण्यात आला. देशाचे ज्येष्ठ नेते शरदचंद्र पवार, माजी मुख्यमंत्री सुशीलकुमार शिंदे यांच्या हस्ते हे पुरस्कार प्रदान करण्यात आले. यावेळी श्री. पवार बोलत होते.

खा. पवार म्हणाले की, पत्रकारांच्या अधिवेशनाला खूप वेळा उपस्थित राहिलो आहे. महाराष्ट्रातील अनेक पत्रकारांशी घनिष्ठ संबंध आहेत. स्व.नीळकंठ खाडिलकर यांनी अनेक वेळा मुलाखती घेतल्या. ‘राजनीती’ पहिले वर्तमानपत्र काढले. नेता, काँग्रेस पत्रिका, सकाळचा विद्यार्थी प्रतिनिधी म्हणून काम केल्याच्या गमतीदार आठवणी त्यांनी सांगितल्या.

सबंध देशाचे चित्र समोर ठेवले तर मोदींच्या नेतृत्वातील भाजप शासित राज्य कमी आहेत. खासकरून केरळ, तामिळनाडू, कर्नाटक, आंध्रमध्ये भाजप नाही. गोव्यामध्ये तोडफोड झाली, महाराष्ट्रामध्ये काही लोकांनी वेगळी भूमिका घेतली. देशातील जवळपास ५ टक्के राज्य भाजपच्या बाजूला नाहीत. देशाच्या पुढील स्थिती येत्या काळात बदलेल असे चित्र आहे. त्यासाठी प्रामाणिक पत्रकारितेची आज खरी गरज आहे. सत्य मांडा, असत्यावर बोट ठेवा, मात्र कुणाच्या तरी सांगण्यावरून काही मांडू नका, असेही ते म्हणाले.

देशापुढील सामाजिक परिस्थिती सुधारण्याचे आव्हान पत्रकारांसमोर – सुशीलकुमार शिंदे

माजी मुख्यमंत्री सुशीलकुमार शिंदे यांनी पत्रकारितेची परंपरा मोठी असल्याचे सांगितले. छोट्या पत्रकारांच्या प्रश्नांना वाचा फोडण्याचे काम ‘व्हाईस ऑफ मीडिया’ने सुरू केले आहे, ते कौतुकास्पद आहे.

आपली राजकीय सुरूवात बारामतीतूनच झाल्याचे सांगून व्हॉईस ऑफ मीडियाने तीन वर्षांत केलेले काम कौतुकास्पद आहे. गेल्या तीन – चार वर्षात देशाची सामाजिक परिस्थीती बिघडत आहे. त्यात सुधार करण्याचं काम सरकारने करायला पाहिजे. त्यात पत्रकारांची भूमिका मोठी राहणार असल्याचं सांगितलं.

दडपशाहीचे धोरण समाजहिताला मारक आहे – खा. कुमार केतकर

पत्रकारिता ही जागतिक पातळीवर अत्यंत बिकट होत आहे. गेल्या ९-१० महिन्यात मणिपूर संघर्ष मिडियापासून दूर आहे. सामाजिक सुरुंग लावले जात आहेत. जाती -पाती मध्ये जाणीवपूर्वक संघर्ष पेटविले जात आहेत. काश्मीरमध्येही पत्रकारितेवर बंधने आहेत. ही परिस्थिती आशियाई देशांमध्ये आहे. या परिस्थीतीतून पत्रकारितेला बाहेर काढण्यासाठी व्हॉइस ऑफ मीडियाने पुढाकार घ्यावा. ही माणसं किती धडपडी आहेत, याची अनुभूती आली. त्यांनी हाती घेतलेले शिवधनुष्य मोठे आहे. आज जगातील पत्रकारिता अडचणीत आली असून ती स्वतंत्र नाही.

पुढचा सेमिनार ईशान्य भारतात घ्या. तो भाग अडचणीत आहे, याची जाणीव इतर भागात नाही. मणिपूरमध्ये चार पत्रकार ठार मारले आहेत. भारतीय सैन्य आसाम रायफलला देखील टार्गेट केले जात आहे. प्रक्षोभक यादवीसदृश परिस्थिती गंभीर बनली आहे. प्रस्थापित सरकार विरोधात वातावरण आहे. २०२४ मध्ये देशातील वातावरण चिघळू शकेल, अशी स्थिती आहे. विधानसभा निवडणुका ह्या ट्रेलर आहेत. नंतर पिक्चर मोठा राहणार आहे. वास्तविक चित्रण करणे पत्रकारांना कठीण होऊन बसले असल्याचेही केतकर यांनी म्हटले आहे.