![](https://i0.wp.com/sthairya.com/wp-content/uploads/2020/11/best.jpg?resize=526%2C257&ssl=1)
स्थैर्य, मुंबई, दि.५: ‘बेस्ट’ कर्मचा-यांची दिवाळीही आता गोड होणार आहे. मुंबईच्या महापौर किशोरी पेडणेकर यांनी बेस्टच्या कर्मचारी आणि अधिका-यांसाठी बोनसची घोषणा केली. ‘बेस्ट’ कर्मचा-यांना १०,१०० रुपयांचा बोनस मिळणार आहे.
बृहन्मुंबई महापालिकेकडून दोन दिवसांपूर्वीच अधिकारी आणि कर्मचा-यांना 15 हजार 500 रुपये बोनस जाहीर झाला. त्यानंतर ‘बेस्ट’च्या कर्मचा-यांनीही बोनससाठी आक्रमक भूमिका घेतली होती. त्यानंतर महापौर किशोरी पेडणेकर यांनी बेस्ट अधिकारी आणि कर्मचा-यांना प्रत्येकी 10 हजार 100 रुपये इतके सानुग्रह अनुदान जाहीर केले.
कोरोना काळात बेस्टमधील कर्मचा-यांनी प्रवाशांना ने-आण करण्याचे महत्वपूर्ण काम केले असल्यामुळे त्यांना सानुग्रह अनुदान मिळाले पाहिजे या भूमिकेतून बेस्टसाठी बोनस जाहीर करण्यात आला आहे. बृहन्मुंबई महानगरपालिका अधिकारी, कर्मचा-यांच्या धर्तीवर बेस्टमधील अधिकारी आणि कर्मचा-यांना सानुग्रह अनुदान मिळावे यासाठी मुख्यमंत्र्यांच्या उपस्थितीत ३ नोव्हेंबर 2020 रोजी वर्षा निवासस्थानी बैठक झाली. या बैठकीत बेस्टच्या कर्मचारी युनियनसोबत सकारात्मक चर्चा झाली होती.