एलआयसी आय पी ओ बाबत आजच मोठा निर्णय! ‘एलआयसी’तील बैठकीकडे गुंतवणूकदारांचे लक्ष
दैनिक स्थैर्य । दि. ११ फेब्रुवारी २०२१ । मुंबई । कोट्यवधी गुंतवणूकदारांचे लक्ष लागून राहिलेल्या भारतीय आयुर्विमा महामंडळाच्या (एलआयसी) प्रारंभिक समभाग विक्री योजनेबाबत आज मोठी बातमी येण्याची शक्यता आहे. आज एलआयसीच्या संचालक मंडळाची बैठक होणार आहे. या बैठकीत आयपीओ प्रस्तावाला हिरवा कंदील दाखवला जाईल, असे सूत्रांनी म्हटलं आहे.
नुकताच संसदेत सादर झालेल्या अर्थसंकल्पात अर्थमंत्री निर्मला सीतारामन यांनी भारतीय आयुर्विमा महामंडळाची प्राथमिक बाजारातील समभाग विक्री याच आर्थिक वर्षात पूर्ण होईल, असा पुनरुच्चार केला होता. त्यानंतर या प्रक्रियेला वेग आला आहे.
विमा नियामक आणि विकास प्राधिकरण अर्थात ‘आयआरडीए’ने एलआयसीला खुल्या बाजारात समभाग विक्री करण्यास परवानगी दिली आहे. यामुळे एलआयसीचा आयपीओच्या दिशेनं जाणारा मार्ग खुला झाला आहे. आज एलआयसीच्या संचालक मंडळाची बैठक होणार आहे. या बैठकीत सेबीकडे सादर होणाऱ्या आयपीओ प्रस्तावाला मंजुरी दिली जाण्याची शक्यता आहे. त्यानंतर तातडीने हा प्रस्ताव सेबीकडे अंतिम मंजुरीसाठी पाठवला जाणार आहे.
एलआयसीच्या आयपीओबाबत भांडवली बाजारात उत्सुकता वाढली आहे. एलआयसीच्या खुल्या समभाग विक्री योजनेत केंद्र सरकार जवळपास ५ टक्के हिस्सा विक्री करण्याची शक्यता आहे. अंशतः हिस्सा विक्रीतून सरकार ६५००० ते ७५००० कोटींचे उत्पन्न मिळवेल.
१३ ते १४ लाख कोटींचे प्रचंड बाजारमूल्य
‘एलआयसी’चे विमा बाजारातील वर्चस्व पाहता महामंडळाचे नेमके मूल्यांकन किती याबाबत अद्याप अधिकृत घोषणा झालेली नाही. मात्र सूत्रांच्या आकडेवारीनुसार एलआयसीचे किमान बाजार मूल्य उरे ५.४ लाख कोटींच्या आसपास असण्याची शक्यता आहे. प्रत्यक्षात या मूल्याच्या अडीच पट मूल्य म्हणजेच तब्बल १३.५ लाख कोटी इतके प्रचंड बाजारमूल्य असण्याची शक्यता आहे. यातील जवळपास ५ टक्के हिश्श्याची विक्री केली जाणार आहे. त्यानुसार आयपीओचे एकूण मूल्य ६७००० कोटींच्या पुढे जाईल. जो आतापर्यंतचा सर्वात मोठा आयपीओ ठरेल. यापूर्वी नोव्हेंबर २०२१ मध्ये पेटीएमचा १८३०० कोटींचा आयपीओ सर्वात मोठा आयपीओ ठरला होता.
