बडेखान-साखरवाडी रस्त्याचे काम सुरू; ग्रामस्थांच्या लढ्याला यश
बडेखान-साखरवाडी रस्त्याच्या दुरुस्तीसाठी ग्रामस्थांनी दिलेल्या आंदोलनाच्या इशाऱ्यानंतर प्रशासनाने दखल घेतली आहे. रस्त्याचे काम लवकरच सुरू होणार असून फेब्रुवारी अखेरीस डांबरीकरण होणार आहे.
स्थैर्य, फलटण, दि. ०२ जानेवारी : बडेखान-साखरवाडी रस्त्याच्या अत्यंत खराब अवस्थेमुळे त्रस्त झालेल्या स्थानिक ग्रामस्थांनी गेल्या आठवड्यात आंदोलनाचा इशारा दिला होता. या इशाऱ्याची आणि मागणीची प्रशासनाने गंभीर दखल घेतली असून, या लढ्याला आता यश आले आहे. संबंधित रस्त्याच्या दुरुस्तीच्या कामाला लवकरच सुरुवात होत असल्याने प्रवाशांना मोठा दिलासा मिळणार आहे.
प्रशासकीय हालचाली आणि पाठपुरावा
रस्त्याची दयनीय अवस्था लक्षात घेऊन फलटणचे नायब तहसीलदार अभिजीत सोनवणे, सार्वजनिक बांधकाम विभागाचे अधिकारी आंबेकर आणि श्रीमती मस्के यांनी प्रत्यक्ष पाहणी करून दुरुस्तीसाठी पुढाकार घेतला. तसेच, माजी खासदार रणजितसिंह नाईक निंबाळकर आणि आमदार सचिन पाटील यांनी प्रशासकीय अधिकाऱ्यांना तातडीने कार्यवाही करण्याच्या सूचना दिल्या होत्या. या संयुक्त प्रयत्नांमुळे हा रस्ता दुरुस्तीचा प्रश्न मार्गी लागला आहे.
फेब्रुवारी अखेरीस होणार डांबरीकरण
सध्या ऊस गळीत हंगाम सुरू असल्याने या रस्त्यावरून कारखान्याची जड वाहतूक मोठ्या प्रमाणावर सुरू आहे. अशा परिस्थितीत पूर्ण डांबरीकरण केल्यास रस्ता पुन्हा खराब होण्याची शक्यता आहे. याबाबत माहिती देताना सार्वजनिक बांधकाम विभागाच्या श्रीमती मस्के यांनी सांगितले की, “सध्या वाहतूक सुरळीत होण्यासाठी रस्त्याच्या साईड पट्ट्या भरून घेतल्या जातील आणि खड्डे बुजवले जातील. कारखाना बंद झाल्यानंतर, फेब्रुवारी महिन्याच्या अखेरीस या रस्त्यावर कार्पेटचे (डांबरीकरण) काम पूर्ण केले जाईल.” ग्रामस्थांनी याची नोंद घेण्याचे आवाहन करण्यात आले आहे.
ग्रामस्थांकडून आभार
रस्त्याचे काम सुरू होत असल्याने खराडेवाडी, तडवळे, घाडगेमळा, नांदल, काळज, साखरवाडी, खामगाव आणि मुरूम या गावांतील ग्रामस्थांनी समाधान व्यक्त केले आहे. जीव मुठीत घेऊन प्रवास कराव्या लागणाऱ्या या रस्त्याचा प्रश्न सुटल्याने ग्रामस्थांनी नायब तहसीलदार, बांधकाम विभागाचे अधिकारी आणि लोकप्रतिनिधींचे आभार मानले आहेत.
