एक ‘आयडियल’ व्यक्तिमत्व: सौ. वैशाली शिंदे
स्थैर्य, फलटण, दि. १७ सप्टेंबर: शिक्षक, समाजसेवक, विचारवंत, प्रयोगशील व्यक्तिमत्त्व आणि एक कुशल मार्गदर्शक अशा विविध भूमिकांमधून फलटणच्या शैक्षणिक आणि सामाजिक क्षेत्रात आपला ठसा उमटवणाऱ्या व्यक्तिमत्त्व म्हणजे सौ. वैशाली शिंदे. ‘आयडियल किड्स इंटरनॅशनल स्कूल’च्या संस्थापिका म्हणून त्यांनी केवळ एक शिक्षण संस्था उभारली नाही, तर आपल्या नावाची आणि कार्याची एक वेगळी ‘आयडियल’ ओळख निर्माण केली आहे. त्यांच्या कार्याचा हा प्रवास इतरांना प्रेरणा देणारा आणि मार्गदर्शक ठरणारा असाच आहे. आज त्यांच्या वाढदिवसानिमित्त, त्यांच्या या प्रेरणादायी प्रवासाचा घेतलेला हा आढावा.
फलटणमध्ये शैक्षणिक क्रांतीचा ‘आयडियल’ पॅटर्न‘
दर्जेदार शिक्षण म्हणजे पुणे-मुंबईसारख्या मोठमोठ्या शहरातील शाळा,’ हा सर्वमान्य समज मोडीत काढून, फलटणसारख्या तालुक्याच्या ठिकाणीही उच्च दर्जाचे आणि नावीन्यपूर्ण शिक्षण देता येते, हे सौ. वैशाली शिंदे यांनी सिद्ध करून दाखवले. त्यांनी फलटणमध्ये इंग्रजी माध्यमाची शाळा सुरू करून, मुलांच्या सर्वांगीण विकासाचे एक केंद्र उभारले आहे. पुस्तकी ज्ञानाच्या पलीकडे जाऊन मुलांची सामाजिक आणि मानसिक जडणघडण व्हावी, यासाठी त्या नेहमीच आग्रही असतात. त्यांच्या शाळेत परिसरातील घडामोडी, साहित्य, बौद्धिक विकास, संगणक, विज्ञान, मैदानी खेळ, किल्ले स्पर्धा आणि कला यांसारख्या अनेक उपक्रमांमधून विद्यार्थ्यांना घडवले जाते, ज्यामध्ये पालकांनाही सहभागी करून घेतले जाते.
संकट काळातही अविरत ज्ञानदान: ‘शिक्षक आपल्या दारी’
कोरोना महामारीच्या काळात, जेव्हा संपूर्ण देश लॉकडाऊनमुळे थांबला होता आणि शिक्षण व्यवस्था ऑनलाइनवर भर देत होती, तेव्हा सौ. शिंदे यांनी एक अत्यंत अभिनव आणि प्रभावी उपक्रम राबवला. ऑनलाइन शिक्षणाच्या मर्यादा ओळखून त्यांनी ‘शिक्षक आपल्या दारी’ ही संकल्पना प्रत्यक्षात आणली. या उपक्रमांतर्गत, शिक्षक स्वतः विद्यार्थ्यांच्या दारी जाऊन, सुरक्षित अंतर राखून ज्ञानदानाचे कार्य करत होते. त्यांच्या या कार्याची दखल राष्ट्रीय आणि आंतरराष्ट्रीय स्तरावरही घेतली गेली. कोरोना काळातील या कार्याबद्दल त्यांना ‘इंडिया रेकॉर्ड’ने सन्मानित केले, तसेच त्यांच्या कार्याचा गौरव आंतरराष्ट्रीय मॅगझिनमध्येही करण्यात आला.
राष्ट्रीय स्तरावरील योगदान आणि सन्मान
सौ. वैशाली शिंदे यांचे कार्य केवळ फलटणपुरते मर्यादित राहिलेले नाही. भारत सरकारच्या नवीन शैक्षणिक धोरण ठरवणाऱ्या सल्लागार समितीवर सल्लागार म्हणून त्यांची निवड झाली आहे. तसेच, वस्तू व सेवा कर (GST) लागू झाल्यानंतर एका महत्त्वाच्या समितीवर त्यांची नियुक्ती करून त्यांच्यावर महत्त्वपूर्ण जबाबदारी सोपवण्यात आली होती. एका संस्थेच्या संस्थापक अध्यक्ष म्हणून कार्यरत असताना, त्यांना आजवर 50 हून अधिक विविध पुरस्कारांनी सन्मानित करण्यात आले आहे.
त्या केवळ एक मुख्याध्यापिका नाहीत, तर एक दूरदृष्टी लाभलेल्या शिक्षणतज्ज्ञ आहेत, ज्यांनी हजारो विद्यार्थ्यांच्या मनात भविष्याची नवी उमेद पेरली आहे.
