आयडियल इंटरनॅशनल स्कूल अँड ज्युनियर कॉलेजमध्ये वार्षिक स्नेहसंमेलनाचा नयनरम्य सोहळा
दैनिक स्थैर्य | दि. १७ जानेवारी २०२५ | फलटण |
आयडियल इंटरनॅशनल स्कूल अँड ज्युनियर कॉलेजचा वार्षिक स्नेहसंमेलनाचा भव्य आणि दिमाखदार सोहळा १० जानेवारी रोजी संध्याकाळी ४ वाजता सजाई गार्डन, फलटण येथे मोठ्या उत्साहात पार पडला.
या सोहळ्यासाठी संस्थेच्या संस्थापिका डॉ. सौ. वैशाली शिंदे, कार्यक्रमाच्या प्रमुख पाहुण्या मृणाल गायकवाड, संस्थेचे डायरेक्टर शिवराज भोईटे, पल्लवी गाडगीळ, मयूर सर, निखिल सर, हर्षल लोंढे आणि इतर मान्यवर उपस्थित होते.
कार्यक्रमाची सुरुवात प्रमुख पाहुण्यांच्या हस्ते दीपप्रज्ज्वलनाने झाली. कार्यक्रमाचे सूत्रसंचालन होम मिनिस्टर फेम नितीन गवळी यांनी अतिशय प्रभावीपणे करत प्रेक्षकांची मने जिंकली.
- ‘स्टुडंट ऑफ द इयर’ पुरस्कार प्रदान
कार्यक्रमात डॉ. सौ. वैशाली शिंदे, मृणाल गायकवाड आणि शिवराज भोईटे यांच्या हस्ते ‘स्टुडंट ऑफ द इयर’ पुरस्कार प्रदान करण्यात आले. ज्युनिअर केजी ते बारावीपर्यंतच्या प्रत्येक वर्गातील स्टुडन्ट ऑफ द इयर ठरलेल्या विद्यार्थ्यांना हा मानाचा पुरस्कार देण्यात आला.
कार्यक्रमात मान्यवरांचे स्वागत फुलांच्या रोपे देऊन करण्यात आले.
- सांस्कृतिक कार्यक्रमाचा उत्साह
सांस्कृतिक कार्यक्रमाची सुरुवात श्री विठ्ठलाच्या भक्तीगीताने झाली. ‘ज्ञानबा-तुकाराम’च्या गजराने सर्व प्रेक्षक मंत्रमुग्ध झाले. इयत्ता नववीतील विद्यार्थी यश पोळ याने ‘वेलकम स्पीच’ दिले.
ज्युनिअर केजी ते बारावीपर्यंतच्या सर्व विद्यार्थ्यांनी या कार्यक्रमात सहभाग घेतला होता. विद्यार्थ्यांनी विविध गाण्यांवर नृत्य सादर करत प्रेक्षकांचे मन जिंकले. त्यांनी बालगीते, भक्तिगीते, देशभक्तीपर गीते, शेतकरी गीते, धनगरी गीते, साऊथ आणि गुजराती गाणी, तसेच हिंदी-मराठी चित्रपटातील गाजलेल्या गीतांवर अप्रतिम नृत्य सादर केले.
भव्य आणि सुंदर रथातील राम सीतेचे आगमन पाहून प्रेक्षक थक्क
हायर ग्रेडच्या विद्यार्थ्यांनी ‘रामायण’ या थीमवर आधारित म्युझिकल ड्रामा सादर केला. रामायणातील विविध प्रसंग विद्यार्थ्यांनी आपल्या सुंदर नृत्यातून प्रभावीपणे सादर केले. रावणाचा वध आणि प्रभू श्रीराम आणि माता सीतेचे भव्य आणि सुंदर अशा रथातून अयोध्येतील आगमन पाहून प्रेक्षक भारावून गेले.
विद्यार्थ्यांच्या उत्कृष्ट नृत्यकौशल्याने आणि त्यांच्या आत्मविश्वासपूर्वक सादरीकरणाने पालकांच्या चेहर्‍यावर समाधान आणि आनंद ओसंडून वाहत होता. मुलांची आकर्षक वेशभूषा, स्टेजवर वावरण्याचा आत्मविश्वास आणि नृत्यातील स्टंट्स पाहून प्रेक्षक थक्क झाले.
- ‘तेजस्विनी अवॉर्ड’चा सन्मान
कार्यक्रमात प्रमुख पाहुण्या मृणाल गायकवाड यांना ‘तेजस्विनी अवॉर्ड’ प्रदान करण्यात आला. हा पुरस्कार शाळेतर्फे दरवर्षी विविध क्षेत्रांत उल्लेखनीय कामगिरी करणार्‍या महिलांना दिला जातो. मृणाल गायकवाड या मृणाल इंटरटेनमेंटच्या संस्थापक असून, मिसेस महाराष्ट्र, मिसेस इंडिया आणि मिसेस हेरिटेज इंटरनॅशनल टायटल्सच्या मानकरी आहेत.
यावेळी मृणाल गायकवाड यांनी सर्व मुलांचे कौतुक आणि अभिनंदन केले. पालकांना विद्यार्थ्यांमधील कलागुणांना वाव देवून कलेला जोपासण्याचा सल्लाही त्यांनी दिला.
- विशेष सन्मान
कार्यक्रमात कोरिओग्राफर तेजस फाळके, स्मिता पवार, श्रावणी पवार, साऊंड व्यवस्थापक जयवंत मुळीक, इव्हेंट मॅनेजर महेश जगताप, तसेच आयडियल कमिटी सदस्य मेघा लोंढे यांचा सन्मान प्रमुख पाहुण्यांच्या हस्ते करण्यात आला.
क्रांतीज्योती महात्मा फुले जयंती उत्सव समितीच्या वतीने डॉ. सौ. वैशाली शिंदे यांचा विशेष सन्मान करण्यात आला. गोविंद भुजबळ आबा, बापूराव शिंदे, विकास शिंदे (पत्रकार दैनिक लोकमत), वैभव नाळे, अंकुश शिंदे आणि दत्ता नाळे यांच्या हस्ते शैक्षणिक आणि सामाजिक योगदानाबद्दल त्यांचा गौरव करण्यात आला.
- डायरेक्टर आणि संस्थापकांचे मार्गदर्शन
कार्यक्रमाच्या मध्यंतरात डॉ. सौ. वैशाली शिंदे यांनी पालकांशी संवाद साधत शाळेच्या प्रगतीची माहिती दिली. आयडियल इंटरनॅशनल स्कूल नावाप्रमाणे संस्कार, संस्कृती, विज्ञान आणि तंत्रज्ञान यांचा समन्वय साधत विद्यार्थ्यांचा सर्वांगीण विकास घडवत असल्याचे त्यांनी सांगितले. फलटण तालुक्यातील बारावीतील पहिले यशस्वी विद्यार्थी ओम गोरे आणि आयआयटी गाठणारे जयदीप कदम हे आपल्या आयडियल इंटरनॅशनल स्कूल अँड ज्युनिअर कॉलेजचे विद्यार्थी असल्याचा अभिमान त्यांनी व्यक्त केला. मागच्यावर्षी याच रंगमंचावर त्यांनी बारावीतील पहिला मुलगा आपल्याच संस्थेचा असेल हा दिलेला शब्द खरा करून दाखवला.
संस्थेचे डायरेक्टर शिवराज भोईटे यांनी आपल्या मनोगतात विद्यार्थ्यांचे आणि शिक्षकांचे कौतुक केले. विद्यार्थ्यांच्या मेहनतीला शिक्षकांचे मार्गदर्शन आणि पालकांचा विश्वास यांची जोड असल्याचे त्यांनी सांगितले. आधुनिक तंत्रज्ञान आणि सॉफ्टवेअरच्या मदतीने शाळा यशाची नवीन शिखरे गाठेल, असा आत्मविश्वास त्यांनी व्यक्त केला.
पालकांचे मनोगत
या कार्यक्रमात शर्वरी बळीप, रोहिणी शिंदे अशा काही पालकांनी आपले मनोगत व्यक्त केले. डॉ. सौ. वैशाली शिंदे या मुलांच्या सर्वांगीण विकासासाठी आणि विद्यार्थ्यांना योग्य दिशा देण्यासाठी करत असलेल्या कार्याबद्दल त्यांनी समाधान व्यक्त केले.
शाळेच्या डायरेक्टर पल्लवी गाडगीळ यांनीही विद्यार्थ्यांना शुभेच्छा देत त्यांचे कौतुक केले.
कार्यक्रमाची सांगता
कार्यक्रमाच्या शेवटी शाळेच्या शिक्षक आणि व्यवस्थापन टीमने संस्थेच्या संस्थापक डॉ. सौ. वैशाली शिंदे आणि डायरेक्टर शिवराज भोईटे यांच्यासह आकर्षक ‘रॅम्प वॉक’ केला.
या सोहळ्याचे संस्थापिका डॉ. सौ. वैशाली शिंदे यांनी उत्कृष्ट नियोजन, सादरीकरण आणि व्यवस्थापन केले होते. विद्यार्थ्यांमधील विविध कलागुणांना वाव मिळावा म्हणून योग्य असा प्लॅटफॉर्म देण्यासाठी त्या कायम धडपडत असतात. विद्यार्थ्यांच्या सर्वांगीण विकासासाठी त्यांनी केलेले परिश्रम प्रेरणादायी ठरले.
कार्यक्रमाचा समारोप सेंटर हेड सुचिता जाधव यांनी आभार मानून केला.
