त्रिभाषा सूत्रावर सर्वोच्च न्यायालयाचा मोठा निर्णय; इयत्ता सहावीच्या विद्यार्थ्यांना मोठा दिलासा
सीबीएसईच्या इयत्ता सहावीच्या विद्यार्थ्यांना त्रिभाषा सूत्राच्या मूल्यमापनातून सवलत देण्याचे निर्देश सर्वोच्च न्यायालयाने दिल्याने लाखो पालकांना व विद्यार्थ्यांना मोठा दिलासा मिळाला आहे.
स्थैर्य, सातारा, दि. २९ सप्टेंबर : केंद्रीय माध्यमिक शिक्षण मंडळाच्या (सीबीएसई) शाळांमध्ये शिकणाऱ्या इयत्ता सहावीच्या विद्यार्थ्यांवरील त्रिभाषा सूत्राच्या सक्तीबाबत सर्वोच्च न्यायालयाने अत्यंत महत्त्वपूर्ण निर्णय दिला आहे. इयत्ता सातवी, आठवी आणि नववीच्या विद्यार्थ्यांना देण्यात आलेली सवलत आता इयत्ता सहावीच्या विद्यार्थ्यांनाही लागू करावी, असे निर्देश न्यायालयाने दिले आहेत. या निर्णयामुळे ऐन शैक्षणिक वर्षात तिसऱ्या भाषेच्या परीक्षेचा अतिरिक्त ताण सहन करणाऱ्या विद्यार्थ्यांना आणि पालकांना मोठा दिलासा मिळाला आहे.
सहावीच्या विद्यार्थ्यांसाठी सवलत लागू
सरन्यायाधीश सूर्यकांत यांच्या अध्यक्षतेखालील पीठासमोर याप्रकरणी सुनावणी पार पडली. सीबीएसईच्या नियमानुसार इयत्ता १० वीच्या बोर्ड परीक्षेत तिसऱ्या भाषेची गुणपत्रिका अनिवार्य न करता तिचे अंतर्गत मूल्यमापन केले जाईल, अशी सवलत सातवी ते नववीच्या विद्यार्थ्यांना देण्यात आली होती. हीच सवलत आता सध्या इयत्ता सहावीत असलेल्या विद्यार्थ्यांच्या बॅचलाही वाढवून देण्याचे स्पष्ट निर्देश न्यायालयाने केंद्र सरकार आणि सीबीएसईला दिले आहेत.
शैक्षणिक ताण कमी करण्यावर न्यायालयाचा भर
शैक्षणिक धोरणातील बदलांमुळे विद्यार्थ्यांवर एकाएकी अतिरिक्त अभ्यासाचा किंवा परीक्षेतील अपयशाचा ताण पडू नये, असा दृष्टिकोन सर्वोच्च न्यायालयाने मांडला. केंद्र सरकारच्या वतीने सॉलिसिटर जनरल तुषार मेहता यांनी बाजू मांडली. न्यायालयाने स्पष्ट केले की, तिसऱ्या भाषेचे मूल्यमापन शाळा पातळीवर अंतर्गत पद्धतीनेच व्हावे, जेणेकरून विद्यार्थ्यांचे शैक्षणिक नुकसान होणार नाही.
