नीरा नदीतील पाण्याचा विसर्ग आणखी घटला, पूर ओसरल्याने जनजीवन पूर्वपदावर

स्थैर्य, फलटण, दि. २२ ऑगस्ट : धरण पाणलोट क्षेत्रातील पावसाने उघडीप दिल्याने नीरा नदीच्या पाणी पातळीत मोठी घट झाली असून, नदीकाठच्या गावांमध्ये आलेली पूरस्थिती पूर्णपणे ओसरली आहे. धरणांमधून होणारा पाण्याचा विसर्ग मोठ्या प्रमाणात कमी केल्याने जनजीवन पूर्वपदावर आले असून, नागरिकांना मोठा दिलासा मिळाला आहे.

नीरा उजवा कालवा विभागाने दिलेल्या माहितीनुसार, नीरा नदीतील एकूण विसर्ग आता केवळ २१,५३८ क्युसेक्स इतका राहिला आहे, जो दोन दिवसांपूर्वी ७२,००० क्युसेक्सच्या वर पोहोचला होता. नीरा देवघर धरणातून होणारा पाण्याचा विसर्ग पूर्णपणे थांबवण्यात (० क्युसेक्स) आला आहे. वीर धरणातूनही विसर्ग कमी करून १५,७९२ क्युसेक्सवर आणण्यात आला आहे, तर भाटघर धरणातून ४,२८४ क्युसेक्स पाणी सोडण्यात येत आहे.

पावसाचा जोर कमी झाल्याने आणि धरणांमधील पाण्याची आवक घटल्याने प्रशासनाने विसर्ग कमी करण्याचा निर्णय घेतला आहे. सध्या नीरा प्रणालीतील एकूण पाणीसाठा ९८.३८% इतका स्थिर आहे. पुराचा धोका टळला असला तरी, प्रशासनाने नदीकाठच्या नागरिकांना सतर्क राहण्याचे आणि नदीपात्रात न जाण्याचे आवाहन केले आहे.

दरम्यान, शेतीसाठी दिलासादायक बाब म्हणजे, नीरा उजवा कालव्यातून फलटण तालुक्याच्या सिंचनासाठी १,३९६ क्युसेक्स पाणी अविरतपणे सोडण्यात येत आहे, ज्यामुळे पिकांना आवश्यक पाणीपुरवठा कायम आहे.