लेखी नोटीस देऊनच शाळेची इमारत उतरवली वाई ब्राम्ह समाज (प्रार्थना संघ) च्या अध्यक्षा प्रियांका साबळे यांची पत्रकार परिषदेत माहिती

स्थैर्य, सातारा, दि.१८: वाई ब्राम्ह समाजाच्या 1486 रविवार पेठ येथील जवळपास 150 वर्षे जुन्या इमारतीत भरविण्यात येणारी शाळा इमारत धोकादायक बनल्याने नोटीस बजावून तेथील वर्ग बंद करण्यात आले. यामध्ये स्वामी विवेकानंद शिक्षण संस्थेच्या गर्ल्स हायस्कूल येथील विद्यार्थीनींचे शैक्षणिक नुकसान करण्याचा हेतू नाही. धोकादायक इमारत असल्याने केवळ जीवित हानी टाळणे हाच हेतूने इमारत उतरवण्याचा निर्णय घेतल्याचा दावा वाई ब्राम्ह समाज संघटनेच्या अध्यक्षा प्रियांका साबळे यांनी पत्रकार परिषदेत केला.

वाई ब्राम्ह समाज संस्थेच्या वतीने 1486 रविवार पेठ येथे स्वामी विवेकानंद शिक्षण संस्थेच्या गर्ल्स हायस्कूलला जागा भाडयाने देण्यात आल्याचा दावा संस्थेने करून करार संपण्यापूर्वीच शाळेची इमारत साहित्य बाहेर काढून पाडण्यात आल्याचा आरोप केला होता. शाळेने या संदर्भात खाजगी स्वरूपाची तक्रार केल्याने वाई ब्राम्ह समाजाच्या अध्यक्षा प्रियांका साबळे यांनी सातार्‍यात पत्रकार परिषद घेऊन आपली बाजू मांडली.

प्रियांका साबळे याबाबत म्हणाल्या, वाई येथील ब्राम्ह समाजाची इमारत ही धोकादायक बनल्याने वाई नगरपालिकेने 7 ऑगस्ट 2019 रोजी नोटीस बजावली होती. ब्राम्ह समाजाने वेळोवळी संस्थेशी पत्रव्यवहार करून इमारत धोकादायक झाली असून आपण गर्ल्स हायस्कूलचे दोन वर्ग व शालेय साहित्य इतरत्र हलवावे अशा लेखी सूचनादेखील केल्या होत्या. या संदर्भात संस्थेशी पुन्हा पत्रव्यवहार करून शाळा मुख्याध्यापकांची सुद्धा भेट घेतली. तसेच ब्राम्ह समाजाच्या कार्यवृत्तांत अहवालामध्येही शिक्षण विभाग, वाई पोलीस स्टेशन, वाई नगर परिषद यांना पत्र देऊन वर्ग भरविण्यास मनाई करावी, अशा मंजूर ठरावाची नोंद आहे.

ब्राम्ह समाजाने धोकादायक इमारतीचा पत्रा काढला असून धोकादायक भाग टप्याटप्प्याने काढण्याची तयारी केली आहे. गर्ल्स हायस्कूलच्या विद्यार्थीनींचे नुकसान होऊ नये व जीवित हानी टाळली जावी, हाच आमचा हेतू आहे. इमारतीचे पत्रे काढले जात असताना संस्थेच्या कर्मचार्‍यांनी शाळा इमारत पाडल्याचा जो स्टंट केला तो दिखावा आहे. संस्थेची वाई शहरात इतरत्र इमारत असतानाही काही विशिष्ट हेतूने तेथे जाणीवपूर्वक वर्ग भरविले जातात. यामागे असणार्‍या हालचालीचा आम्ही शोध घेत असून या संदर्भात आमची स्वामी विवेकानंद शिक्षण संस्थेच्या पदाधिका यांशी चर्चा सुरू आहे. प्रार्थना समाजाने इमारत उतरविण्याचे काम नियमानुसारच केले आहे, त्याचा कोणी गैर अर्थ लावू नये असा इशारा प्रियांका साबळे यांनी पत्रकार परिषदेत दिला.