नगरपालिका निवडणुकांसाठी मतदार यादीचा कार्यक्रम जाहीर
स्थैर्य, फलटण, दि. ०१ ऑक्टोबर : राज्यातील २४७ नगरपालिका आणि ४२ नगरपंचायतींच्या सार्वत्रिक निवडणुकांसाठी राज्य निवडणूक आयोगाने मतदार यादीचा कार्यक्रम जाहीर केला आहे. यानुसार, दि. ०८ ऑक्टोबर रोजी प्रभागनिहाय प्रारूप मतदार यादी प्रसिद्ध केली जाणार असून, त्यावर १३ ऑक्टोबरपर्यंत हरकती व सूचना दाखल करता येणार आहेत.
राज्य निवडणूक आयोगाचे सचिव सुरेश काकाणी यांनी प्रसिद्धीस दिलेल्या पत्रकानुसार, भारत निवडणूक आयोगाने तयार केलेली व दि. ०१ जुलै २०२५ रोजी अस्तित्वात असलेली विधानसभा मतदार यादी या निवडणुकांसाठी ग्राह्य धरण्यात येणार आहे. याच यादीवरून नगरपरिषदा/नगरपंचायतींसाठी प्रभागनिहाय मतदार याद्यांचे विभाजन केले जाईल.
असा आहे मतदार यादीचा कार्यक्रम:
- प्रभागनिहाय प्रारूप मतदार यादी प्रसिद्ध करणे : ०८ ऑक्टोबर २०२५
- हरकती व सूचना दाखल करण्याचा कालावधी : ०८ ऑक्टोबर ते १३ ऑक्टोबर २०२५
- अंतिम प्रभागनिहाय मतदार यादी प्रसिद्ध करणे : २८ ऑक्टोबर २०२५
- मतदान केंद्रांवर यादी प्रसिद्ध करणे : ०७ नोव्हेंबर २०२५
प्रारूप मतदार यादीवर हरकती व सूचना दाखल करण्यासाठी नागरिकांना संधी दिली जाणार आहे. यामध्ये लेखनिकांच्या चुका, दुसऱ्या प्रभागातील मतदाराचे नाव चुकून समाविष्ट होणे, विधानसभा यादीत नाव असूनही प्रभाग यादीत नाव नसणे किंवा मृत व्यक्तीचे नाव असणे अशा बाबींवर हरकत घेता येईल. प्राप्त झालेल्या हरकती व सूचना विचारात घेऊन संबंधित जिल्हाधिकाऱ्यांच्या प्राधिकृत अधिकाऱ्यांमार्फत अंतिम मतदार यादी तयार केली जाईल.
मतदारांना आपले नाव शोधण्यासाठी आयोगाच्या https://mahasecvoterlist.in या संकेतस्थळावर सुविधा उपलब्ध करून देण्यात येणार आहे. तसेच, संपूर्ण निवडणूक कार्यक्रमाची माहिती आयोगाच्या https://mahasec.maharashtra.gov.in या अधिकृत संकेतस्थळावर उपलब्ध आहे.
