अडवलेल्या जेसीबीनेच विकास दुबेचा किल्ला जमीनदोस्त; अलीशान गाड्यांचाही केला चक्काचूर
विकास दुबेवर ५० हजारांचं बक्षीस जाहीर, आई म्हणाली ‘ठार करा’
स्थैर्य, कानपुर, दि. ०४ : चकमकीत ८ पोलिस शहिद झाल्यानंतर फरार गँगस्टर विकास दुबे याचा कसून शोध घेतला जात असून आज उत्तर प्रदेश पोलिसांनी दुबे याचा कानपूरमधील बिठूर येथे असलेला बंगला जमीनदोस्त करण्याची कारवाई सुरू केली आहे. पोलिसांची एकूण २० पथके विविध दिशेला दुबेचा शोध घेत आहेत. या सर्व भागांमध्ये विकास दुबेचे नातेवाईक राहतात.
पोलिसांनी या प्रकरणात आतापर्यंत एकूण चौकशीसाठी १२ लोकांना ताब्यात घेतले आहे. या चौकशीनंतर विकास दुबेला लवकरात लवकर पकडण्यात यश मिळेल असा विश्वास पोलिसांना वाटतो आहे. विकास दुबे हा नेपाळला पळून गेला असावा असाही अंदाज व्यक्त करण्यात येत आहे. या प्रकरणी लखीमपूर पोलिसही अलर्टवर आहेत.
विकास दुबे नेपाळमध्ये पळून जाण्याची शक्यता लक्षात घेत पोलिसांनी नेपाळ सीमेवरही सर्व यंत्रणांना अलर्ट केले आहे. उत्तर प्रदेशला लागून १२० किमीची नेपाळ सीमा आहे. तसेच ४ पोलिस ठाणी आहेत. सीमेवर प्रत्येक ठिकाणी विकास दुबेचा फोटो लावण्यात आला आहे. या बरोबर सशस्त्र सीमा दलाच्या अधिकाऱ्यांशीही पोलिसांचे बोलणे झाले आहे. जिल्ह्याच्या सीमेवर देखील अलर्ट घोषित करण्यात आला असून वेगाने तपास करण्यात येत आहे.
या बरोबरच पोलिसांनी मोबाइल कॉल तपशीलाच्या आधारे अनेक लोकांना ताब्यात घेतले आहे. या सर्वांची चौकशी केली जात आहे. ताब्यात घेण्यात आलेल्या सर्व लोकांनी गेल्या २४ तासांमध्ये विकास दुबेशी फोनद्वारे बोलणे केले आहे.
पोलिसही संशयाच्या भोवऱ्यातज्या लोकांनी दुबेशी बोलणे केले आहे, अशा लोकांमध्ये काही पोलिसांचाही समावेश आहे. या मुळे जेव्हा विकास दुबेची चौकशी करण्यासाठी पोलिसांचे पथक काल विकास दुबेच्या घरी निघाले असताना पोलिसांपैकी कोणी याची माहिती विकास दुबेला पुरवली का याबाबतही शंका व्यक्त केली जात आहे. विकास दुबेच्या घरी निघण्यापूर्वी या पोलिसांनीच विकास दुबेला कल्पना दिली असावी असा संशयही व्यक्त केला जात आहे. पोलिस त्या दिशेनेही तपास करत आहेत.
या बाबत मिळालेल्या माहितीनुसार, चौबेपूर ठाण्याच्या एका पोलिस निरीक्षकाने पोलिस येण्याची माहिती अगोदरच दिली होती. यामुळे एक पोलिस निरीक्षक, एक शिपाई आणि एक होमगार्ड संशयाच्या भोवऱ्यात सापडले आहेत. या तिघांचीही कॉल डिटेल्सच्या आधारे चौकशी केली जात आहे.
