ढवळमध्ये ‘आमच्याकडे बघून शिव्या का देतोस’ या गैरसमजातून चुलत्याला लाकडी काठीने बेदम मारहाण! दोन सख्ख्या पुतण्यांवर गुन्हा दाखल
ढवळ (ता. फलटण) येथे स्वतःच्या मुलाला शिव्या देत असलेल्या एका ५० वर्षीय व्यक्तीला ‘तू आम्हाला शिव्या का देतोस’ असा गैरसमज करून घेत दोन सख्ख्या पुतण्यांनी लाकडी काठी आणि लाथाबुक्क्यांनी बेदम मारहाण केल्याची घटना घडली आहे. याप्रकरणी फलटण ग्रामीण पोलिसांत गुन्हे दाखल करण्यात आले आहेत.
स्थैर्य, फलटण, दि. १० मार्च : स्वतःच्या मुलाच्या वागण्याला कंटाळून त्याच्या नावाने बडबड करत असलेल्या एका ५० वर्षीय चुलत्याला, ‘तू आमच्याकडे बघून आम्हाला शिव्या का देतोस’ असा गैरसमज करून घेत त्यांच्या दोन सख्ख्या पुतण्यांनी लाकडी काठी आणि लाथाबुक्क्यांनी बेदम मारहाण केल्याची घटना ढवळ (ता. फलटण) येथे घडली आहे. याप्रकरणी फलटण ग्रामीण पोलीस ठाण्यात दोन्ही पुतण्यांविरुद्ध गुन्हा दाखल करण्यात आला आहे.
याप्रकरणी राजाराम जिजाबा जाधव (वय ५० वर्षे, व्यवसाय मजुरी, रा. ढवळ, ता. फलटण) यांनी फलटण ग्रामीण पोलिसांत फिर्याद दिली आहे.
पोलिसांनी दिलेल्या माहितीनुसार, राजाराम जाधव हे सोमवारी (दि. ९ मार्च) सकाळी ९.३० वाजण्याच्या सुमारास ढवळ गावातील चौकात असलेल्या मंडलकर यांच्या पानटपरीजवळ उभे होते. ते त्यांचे सहकारी बापू मारुती शेळके (रा. नांदल) यांच्यासोबत सुरवडी येथे गवंडी कामाला जाण्यासाठी थांबले होते.
त्यावेळी राजाराम जाधव हे बापू शेळके यांच्याजवळ, ‘माझा मुलगा सुरज काही काम न करता बाहेर कुठेतरी निघून गेला आहे,’ असे सांगून स्वतःच्या मुलाला उद्देशून शिवीगाळ करत होते. नेमक्या त्याच वेळी रस्त्याच्या दुसऱ्या बाजूला (ढवलाई मंदिराकडे जाणाऱ्या रस्त्याच्या कडेला) राजाराम यांचे पुतणे मल्हारी नामदेव जाधव आणि उमाजी नामदेव जाधव हे दोघे उभे होते.
गैरसमजातून लाकडी काठीने मारहाण
राजाराम यांचा आवाज ऐकून हे दोघेही त्यांच्याजवळ आले आणि “तू आमच्याकडे बघून आम्हाला शिवीगाळ का करतोय,” असे म्हणत त्यांनी राजाराम यांना शिवीगाळ व दमदाटी करण्यास सुरुवात केली. गैरसमजातून सुरू झालेल्या या वादाचे रूपांतर हाणामारीत झाले. उमाजी जाधव याने राजाराम यांना हाताने व लाथाबुक्क्यांनी मारहाण केली, तर मल्हारी जाधव याने त्याच्या हातातील लाकडी काठीने राजाराम यांच्या डाव्या पायाच्या पोटरीवर, दोन्ही गुडघ्यांवर आणि कमरेच्या डाव्या बाजूला जोरात मारहाण करून त्यांना जखमी केले.
त्यावेळी तिथे उपस्थित असलेले बापू शेळके, भीमराव जिजाबा जाधव आणि गंगाराम जानू जाधव यांनी मध्यस्थी करत ही भांडणे सोडवली. या प्रकारानंतर राजाराम जाधव यांनी घरी जाऊन घडलेली हकीकत पत्नी उषा हिला सांगितली. त्यानंतर त्यांनी पोलिसांत जाऊन वैद्यकीय यादी घेतली आणि रुग्णालयात उपचार घेतल्यानंतर फलटण ग्रामीण पोलीस ठाण्यात धाव घेत फिर्याद दाखल केली.
त्यांच्या या फिर्यादीवरून मल्हारी नामदेव जाधव आणि उमाजी नामदेव जाधव (दोघे रा. ढवळ, ता. फलटण) यांच्यावर कायदेशीर गुन्हा दाखल करण्यात आला असून पोलीस अधिक तपास करत आहेत.
