मुधोजीच्या मिहिकाने वृक्षारोपण करून वाढदिवस खास केला साजरा
दैनिक स्थैर्य | दि. 21 जुलै 2025 । फलटण । फलटण एज्युकेशन सोसायटीच्या मुधोजी हायस्कूल व ज्युनियर कॉलेजमध्ये इयत्ता आठवीत शिकणारी कु. मिहिका देवेंद्र हेंद्रे यांनी आपला वाढदिवस निसर्ग संवर्धनाच्या एका अनोख्या व अर्थपूर्ण उपक्रमाद्वारे साजरा केला. दिनांक २० जुलै २०२५ रोजी त्यांनी विद्यालयाच्या परिसरात विविध वृक्ष लावून पर्यावरणाप्रती कृतज्ञता व्यक्त केली. या माध्यमातून तिने पर्यावरण संवर्धनाचा संदेश विद्यार्थ्यांमध्ये रुजवण्याचा हेतू दर्शविला.
प्रशालेत वृक्षारोपणाचा कार्यक्रम विद्यार्थिनीच्या वाढदिवसाच्या निमित्ताने भारावलेला होता; प्राचार्य वसंतराव शेडगे यांनी सांगितले की मानवाकडून सध्या पर्यावरणावर होत असलेल्या हानीपासून संरक्षण हे आपले सामूहिक कर्तव्य आहे. मिहिका व तिच्या पालकांनी दाखवलेले पर्यावरणप्रेम व वृक्षसंवर्धनाची कृतज्ञता इतर विद्यार्थ्यांसाठी अनुकरणीय ठरावी, असे त्यांनी आवाहन केले. यावेळी त्यांनी मिहिकाला वाढदिवसाच्या शुभेच्छांसाठी पुष्पगुच्छ प्रदान केले.
वृक्षारोपणाचा कार्यक्रम मिहिकाचे वडील देवेंद्र माधवराव हेंद्रे यांच्या हस्ते व प्राचार्य वसंतराव शेडगे, माध्यमिक विभाग उपमुख्याध्यापक ए. वाय. ननवरे, उच्च माध्यमिक विभाग उपप्राचार्य सोमनाथ माने यांचे मार्गदर्शनाखाली पार पडला. कार्यक्रमास मिहिकाची आई, आजी, हरित सेनेचे प्रमुख श्रीकांत तावरे, माध्यमिक विभागाच्या प्रमुख कु संगीता कदम आणि अन्य शिक्षणकर्मी तसेच मान्यवर उपस्थित होते.
प्रशालेत वृक्षारोपण हा उपक्रम फक्त वाढदिवस साजरा करण्यापुरता मर्यादित न राहता पर्यावरण संवर्धनाची गरज व महत्त्व पटवून देणारा ठरला आहे. भविष्यात असे अनेक उपक्रम राबवून पर्यावरण जागरूकता वाढविणे अपेक्षित आहे.
