“हारकर जितने वाले को ‘बाजीगर’ कहते है! ३५ वर्षांच्या सत्तेला सुरुंग लावत रणजीतसिंहांनी जिंकली फलटणची ‘बाजी’!”

स्थैर्य, फलटण, दि. 22 डिसेंबर : “Power is not given, it is taken…” (KGF) या लोकप्रिय डायलॉगचा प्रत्यय काल फलटणच्या जनतेने घेतला. गेली ३५ वर्षे फलटणच्या सत्तेवर एकहाती अंमल गाजवणाऱ्या विधान परिषदेचे माजी सभापती श्रीमंत रामराजे नाईक निंबाळकर यांच्या अभेद्य किल्ल्याला अखेर खिंडार पडले आहे. काल लागलेल्या नगरपरिषद निवडणुकीच्या निकालात माढा लोकसभा मतदारसंघाचे माजी खासदार रणजीतसिंह नाईक निंबाळकर यांनी आपल्या राजकीय चातुर्याने आणि नवनिर्वाचित नगराध्यक्ष समशेरसिंह नाईक निंबाळकर यांच्या दांडग्या जनसंपर्काने अशक्य वाटणारा विजय शक्य करून दाखवला आहे.

“ये तो बस ट्रेलर है, पिक्चर अभी बाकी है!”

कालचा दिवस फलटणच्या राजकीय इतिहासात सुवर्ण अक्षरांनी लिहिला गेला. निवडणूक निकालाने स्पष्ट केले की, जनतेला आता फक्त आश्वासने नकोत, तर ‘ॲक्शन’ हवी आहे. रणजीतसिंहांनी हाती घेतलेली सूत्रे आणि समशेरसिंहांना मिळालेला जनतेचा कौल, यामुळे रामराजेंच्या तीन दशकांच्या सत्तेचा ‘द एंड’ झाला आहे. हा विजय म्हणजे केवळ एका नगरपरिषदेचा विजय नसून, हे भविष्यातील राजकारणाचे ‘टीझर’ आहे, असे म्हटल्यास वावगे ठरणार नाही.

बंधू-प्रेमाची ‘मिर्झापूर’ स्टाईल केमिस्ट्री

या निवडणुकीत दोन सख्ख्या भावांमधील अतूट नाते आणि ताळमेळ पाहायला मिळाला.

रणजीतसिंह : वयाने लहान असूनही, त्यांनी “शतरंज का खिलाडी” बनून संपूर्ण निवडणुकीची रणनीती आखली. किंगमेकरची भूमिका बजावत त्यांनी मोठ्या भावाचा सन्मान राखला.
समशेरसिंह : वयाने मोठे असणारे समशेरसिंह हे “अपन की पब्लिक, पब्लिक का अपन” या उक्तीप्रमाणे जनतेचे लाडके आहेत. २५ वर्षांचा अनुभव आणि साधी राहणी यामुळे त्यांनी मतदारांची मने जिंकली. धाकट्या भावाचे ‘डॅशिंग’ नियोजन आणि मोठ्या भावाचा ‘संयमी’ चेहरा, या कॉम्बिनेशनने विरोधकांना “खलास” केले.

सत्तेविना साम्राज्य: “Risk है तो Ishq है!”

रणजीतसिंह नाईक निंबाळकर यांची राजकीय आणि औद्योगिक वाटचाल ही एखाद्या चित्रपटाच्या पटकथेपेक्षा कमी नाही. जेव्हा हातात कोणतीही सत्ता नव्हती, राजकीय वारं विरोधात होतं, तेव्हा त्यांनी “मैं झुकेगा नही…” म्हणत संघर्ष चालू ठेवला.

उद्योग विश्वातील भरारी: फार कमी लोकांना ठाऊक आहे की, रणजीतसिंह यांनी अवघ्या ‘तिशी’त असताना ‘महाराष्ट्र चेंबर ऑफ कॉमर्स’चे अध्यक्षपद भूषवले होते. एवढ्या तरुण वयात व्यापाऱ्यांचे नेतृत्व करणे ही साधी गोष्ट नव्हती.
रोजगाराचा निर्माता: सत्तेची वाट न बघता त्यांनी ‘स्वराज डेअरी’च्या माध्यमातून दुग्ध व्यवसायात क्रांती केली. त्यानंतर वडील लोकनेते हिंदुराव नाईक निंबाळकर यांच्या नावाने साखर कारखाना उभा केला. आज ‘लोकनेते’ कारखाना फलटण तालुक्यात सर्वाधिक दर (FRP) देणारा कारखाना म्हणून ओळखला जातो. हजारो तरुणांच्या हाताला काम देऊन त्यांनी खऱ्या अर्थाने ‘नायक’त्वाची भूमिका बजावली आहे.

‘बाहुबली’ जिजामाला वहिनी

पुरुषांच्या बरोबरीने राजकारणात महिलांचे नेतृत्व किती प्रभावी ठरू शकते, याचे उत्तम उदाहरण म्हणजे सौ. जिजामाला रणजीतसिंह नाईक निंबाळकर. शासनाची ‘लाडकी बहीण’ योजना आता आली, पण त्याआधीच जिजामाला वहिनींनी फलटण तालुक्यात ‘लाडक्या भावाची (रणजीतसिंहांची) लाडकी बहीण’ हे नाते घट्ट केले होते. प्रत्येक जिल्हा परिषद गट आणि शहराच्या वॉर्डात हळदी-कुंकू समारंभाच्या माध्यमातून त्यांनी महिलांचे एक ‘स्ट्रॉंग नेटवर्क’ तयार केले. रणजीतसिंहांच्या यशात वहिनींचा हा ‘सायलेंट’ पण ‘सॉलिड’ पाठिंबा निर्णायक ठरला.

१९९१ चा इतिहास आणि २०२४ चा भूगोल

१९९१ साली विधान परिषदेचे माजी सभापती श्रीमंत रामराजे नाईक निंबाळकर यांनी तत्कालीन फायरब्रँड नेते आणि आमदार स्व. चिमणराव कदम यांच्या पॅनलचा पराभव करत सत्तेत प्रवेश केला होता. त्यानंतर १९९५ मध्ये स्व. चिमणराव कदमांचा विधानसभेत पराभव करत त्यांनी एकछत्री अंमल सुरू केला. पण “अपना टाईम आएगा” यावर विश्वास ठेवून लढणाऱ्या रणजीतसिंहांनी ३५ वर्षांनंतर इतिहासाची पुनरावृत्ती टाळत, नवीन इतिहास रचला. फलटण रेल्वे, निरा-देवघरचे पाणी आणि प्रशासकीय इमारतींची मंजुरी, या विकासकामांच्या जोरावर त्यांनी रामराजेंच्या सत्तेचा भूगोल बदलून टाकला.

मास्टरस्ट्रोक: “दिमाग की बत्ती जला दे!”

नगराध्यक्षपदाच्या निवडीवेळी मोठा ट्विस्ट आला. हे पद खुल्या प्रवर्गासाठी होते आणि दिलीपसिंह भोसले यांचे नाव आघाडीवर होते. पण जेव्हा रामराजेंचे सुपुत्र रिंगणात उतरले, तेव्हा रणजीतसिंहांनी रणनीती बदलली. “हिला डाला ना?” अशा थाटात त्यांनी दिलीपसिंह भोसले यांना विश्वासात घेतले आणि घरातील अनुभवी व्यक्तीमत्व, समशेरसिंह यांना उमेदवारी दिली. हा ‘मास्टरस्ट्रोक’ विरोधकांना चितपट करणारा ठरला.

फलटणच्या राजकारणात आता “सिंघम” स्टाईलने नवीन पर्वाला सुरुवात झाली आहे. धाकट्या भावाचे व्हिजन आणि मोठ्या भावाचा अनुभव, यामुळे फलटण आता विकासाच्या ‘एक्स्प्रेस वे’वर धावणार, यात शंका नाही.