नव्या निर्णयामुळे फलटणमध्ये वाढणार चार नगरसेवक; प्रभागरचनेत सुध्दा होणार बदल

दैनिक स्थैर्य । दि. २९ ऑक्टोबर २०२१ । फलटण । राज्यातील झपाट्याने वाढलेली लोकसंख्या तसेच नागरी विकास योजनांचा वेग वाढविण्याची गरज लक्षात घेऊन महानगरपालिका व नगरपरिषदांमधील निर्वाचित सदस्यांच्या संख्येमध्ये वाढ करण्याचा निर्णय नुकत्याच झालेल्या मंत्रिमंडळ बैठकीत घेण्यात आलेला आहे. बदललेल्या निर्णयानुसार फलटण शहरांमध्ये सुमारे तीन ते चार नगरसेवकांची भर पडण्याची शक्यता वर्तवली जात आहे. यानुसारच फलटण शहरातील संपूर्ण प्रभाग रचना ही बदलणार आहे. चार नगरसेवक म्हणजेच दोन प्रभाग फलटण शहरांमध्ये वाढणार आहेत.

2011 च्या जनगणनेच्या आकडेवारीच्या आधारावर महानगरपालिका व नगरपरिषदांमधील सदस्य संख्या निर्धारित आहे. कोविड-19 च्या प्रादुर्भावामुळे 2021 च्या जनगणनेचे निष्कर्ष अप्राप्त आहेत. त्यास आणखी काही कालावधी लागणार आहे. या कालावधीत लोकसंख्या वाढीचा सरासरी वेग गृहित धरुन अधिनियमात नमुद केलेल्या महानगरपालिका व नगरपरिषदांच्या किमान सदस्य संख्येत 17 टक्के इतकी वाढ करण्याचा निर्णय घेण्यात आलेला आहे. किमान सदस्य संख्या वाढविल्यामुळे पुढील सदस्य संख्या देखील वाढेल व त्यामुळे पर्याप्त सदस्य संख्या निश्चित होईल.

फलटण नगरपरिषद ही ब वर्ग नगरपरिषद आहे. नुकत्याच झालेल्या मंत्रिमंडळ निर्णयानुसार ब वर्ग नगरपरिषदांमध्ये निवडून आलेल्या परिषद सदस्यांची किमान संख्या 25 व अधिक संख्या 37 हून अधिक नसेल. नगरपरिषदांमधील सदस्य संख्या किमान 17 सदस्य व कमाल 65 इतकी आहे. महानगरांमधील व लहान नागरी क्षेत्रांमध्ये झालेले रचनात्मक परिवर्तन व नागरी समस्यांची उकल व विकास योजनांचा वेग वाढविणे यासाठी सर्व कार्यक्षेत्राला योग्य न्याय देण्याच्या दृष्टीने सदस्य संख्या वाढविण्याची आवश्यकता आहे.