आमदार निलेश लंके यांच्या ‘शरदचंद्रजी पवार आरोग्य मंदिरासाठी’ कु.स्वरा भागवतचा मदतीचा हात
स्थैर्य, फलटण दि.०५: फलटण तालुक्याच्या पूर्व भागातील गोखळी येथील सुप्रसिद्ध अॅथलीट कु.स्वरा योगेश भागवत हिने स्वतःच्या बचतीचे पिगी बँक (गल्ला) मधील पैसे आमदार निलेश लंके यांचेकडे ‘शरदचंद्रजी पवार आरोग्य मंदिरातील’ रुग्ण सेवेसाठी सुपुर्द केले.
पारनेर तालुक्याचे बहुचर्चित आमदार निलेश लंके नुकतेच फलटण तालुक्यात एका कार्यक्रमासाठी आले असताना कु.स्वरा भागवतने आमदार निलेश लंके यांना भेटण्याची इच्छा एका व्हिडिओव्दारे व्यक्त केली होती. सदर व्हिडिओ पाहिल्यानंतर आ. लंके यांनी आपल्या फलटण दौर्यादरम्यान कु.स्वरा भागवत हिची आवर्जून भेट घेतली. यावेळी कु.स्वराने स्वतः च्या बचतीचे पैसे निलेश लंके प्रतिष्ठान व शरदचंद्रजी पवार कोविड सेंटर या आरोग्य मंदिरासाठी आ.लंके यांचेकडे सुपूर्द केले.
यावेळी पारनेरचे गटविकास अधिकारी किशोर माने, आयुर उद्योगाचे प्रमुख दिगंबर आगवणे,गोखळी तंटामुक्ती समितीचे अध्यक्ष मनोजतात्या गावडे, भैरवनाथ विकास सोसायटीचे चेअरमन शिवाजी लंगुटे आदी मान्यवर उपस्थित होते.
