स्वामी समर्थांच्या पादुकांचे बुधवारी सातार्‍यात आगमन

स्थैर्य, सातारा, दि. 28 नोव्हेंबर : अक्कलकोट येथील राजघराण्याचे श्रीमंत मालोजीराजे भोसले (द्वितीय) यांना श्री स्वामी समर्थ महाराजांनी दिलेल्या पादुकांच्या दर्शन दौर्‍याचे आयोजन महाराष्ट्र, कर्नाटक आणि गोवा राज्यातील भाविकांसाठी करण्यात आले आहे. या पादुका सोहळा बुधवार दि. 8 रोजी सातारा येथे येणार असून गुरुवार दि. 9 डिसेंबर रोजी फलटण येथे आगमन होणार असल्याची माहिती श्री अक्कलकोट राजघराणे छत्री ट्रस्ट यांच्यावतीने प्रसिद्धी पत्रकाद्वारे देण्यात आली.

पत्रकात म्हटले आहे, की अक्कलकोट राजघराण्याचे श्रीमंत मालोजीराजे भोसले (द्वितीय) यांना सदद्गुरू श्री स्वामी समर्थ महाराजांनी प्रत्यक्ष कृपावंत होऊन आपल्या पवित्र पादुका प्रदान केल्या होत्या. या पवित्र चरणकमलांचे दर्शन विद्यमान नरेश श्रीमंत मालोजीराजे संयुक्ताराजे भोसले तिसरे यांच्या पुढाकाराने आयोजित करण्यात आले आहे.

या पादुका महाराष्ट्र, कर्नाटक आणि गोवा राज्यांतील प्रमुख नगरात भाविकांच्या दर्शनासाठी 6 सहा डिसेंबरपासून दौरा करणार आहेत. या सोहळ्याचे आठ डिसेंबरला सातार्‍यात व नऊ डिसेंबरला फलटणमध्ये आगमन होणार आहे. त्यानंतर मिरज, सांगली, मुधोल, फोंडा, पणजी, सावंतवाडी, कागल, कोल्हापूर, भोर, पिंपरी-चिंचवड, पुणे, मुंबई, ठाणे आणि डोंबिवली आदी ठिकाणच्या भाविकांना या पादूकांचे दर्शन घेण्यासाठी उपलब्ध होणार आहे.

सातारा व फलटणमधील सर्वप्रथम राजघराण्यात या पादुकांचे विधिवत पूजन करण्यात येणार आहे. त्यानंतर सातारा व फलटण येथील भाविकांसाठी दर्शनासाठी उपलब्ध होणार आहे. या पादूकांच्या दर्शनाची संपूर्ण व्यवस्था करण्यात येत आहे. या दर्शनाचा लाभ घेण्याचे आवाहन संयोजकांनी केले आहे.

अक्कलकोट येथील श्रीमंत मालोजीराजे भोसले यांच्या मार्गदर्शनाखाली स्वामी भक्तांच्या सेवेसाठी ‘अनुभूती’ या नावाचा एक भव्य प्रकल्प त्यांनी हाती घेतलेला आहे. या प्रकल्पांतर्गत श्री स्वामी समर्थांची 108 फूट भव्य दिव्य मूर्ती, ध्यान केंद्र, चिकित्सालय, उद्यान, भक्तनिवास आदी अशा मूलभूत आणि पूरक सुविधांच्या विकासाचे नियोजन करण्यात आले आहे, अशी माहिती संयोजकांनी दिली आहे.