सुखेडमधील अज्ञाताचा खून उघड; अनैतिक संबंधाच्या संशयातून ‘गेम’; ७२ तासांत स्थानिक गुन्हे शाखेने लावला छडा! ४ आरोपी गजाआड
खंडाळा तालुक्यातील सुखेड येथे विहिरीत अर्धवट जळालेल्या अवस्थेत सापडलेल्या अज्ञात तरुणाच्या खुनाचा उलगडा. अनैतिक संबंधाच्या संशयातून कळंबोलीतून अपहरण करून खून. सातारा स्थानिक गुन्हे शाखेची ७२ तासांत धडाकेबाज कामगिरी. वाचा सविस्तर…
स्थैर्य, सातारा, दि. १० फेब्रुवारी : खंडाळा तालुक्यातील सुखेड (Sukhed) येथील एका विहिरीत हातपाय बांधलेल्या आणि अर्धवट जळालेल्या अवस्थेत सापडलेल्या अज्ञात तरुणाच्या खुनाचा गुंता सोडवण्यात सातारा स्थानिक गुन्हे शाखेला (LCB Satara) आणि लोणंद पोलिसांना मोठे यश आले आहे. अनैतिक संबंधाच्या संशयातून हा खून केल्याचे निष्पन्न झाले असून, पोलिसांनी केवळ ७२ तासांत तपास करून मुख्य सूत्रधारासह ४ आरोपींना बेड्या ठोकल्या आहेत.
मृताचे नाव अद्याप समजू शकले नसले तरी, हा खून कळंबोली (नवी मुंबई) येथून अपहरण करून सुखेडच्या हद्दीत आणून केल्याचे तपासात उघड झाले आहे.
दिनांक ०६ फेब्रुवारी २०२६ रोजी सकाळी ९.३० च्या सुमारास सुखेड (ता. खंडाळा) येथील चोपडे वस्तीजवळील आबा जयवंत चोपडे यांच्या विहिरीत एका २५ ते ३० वयोगटातील अज्ञात पुरुषाचा मृतदेह आढळून आला होता. मृतदेहाचे हातपाय बांधलेले होते आणि पुरावा नष्ट करण्यासाठी तो अर्धवट जाळण्यात आला होता. याप्रकरणी लोणंद पोलीस ठाण्यात सुरुवातीला अकस्मात मृत्यू आणि नंतर खुनाचा गुन्हा (गु.र.नं. ६५/२०२६) दाखल करण्यात आला होता.
सीसीटीव्ही आणि ‘होंडा सिटी’ कारने दिला सुगावा
पोलीस अधीक्षक तुषार दोशी (SP Tushar Doshi) आणि अपर पोलीस अधीक्षक डॉ. वैशाली कडुकर यांच्या मार्गदर्शनाखाली स्थानिक गुन्हे शाखेचे पोलीस निरीक्षक अरुण देवकर (PI Arun Devkar) यांनी समांतर तपास सुरू केला. पथकाने घटनास्थळाकडे येणाऱ्या-जाणाऱ्या मार्गांवरील सीसीटीव्ही फुटेजची कसून तपासणी केली असता, एक संशयास्पद होंडा सिटी कार (MH-12 DY 8846) पोलिसांच्या रडारवर आली.
तपासाची चक्रे कळंबोली ते सातारामार्गे पुण्यात!
तांत्रिक विश्लेषणाद्वारे या कारचा माग काढत एलसीबीचे एक पथक तात्काळ कळंबोली (Kalamboli) येथे रवाना झाले. तेथून मुख्य संशयिताला ताब्यात घेऊन पोलिसी खाक्या दाखवताच त्याने गुन्ह्याची कबुली दिली.
मैत्रिणीशी संबंधाचा संशय; असा केला ‘काटा’
मुख्य आरोपीने दिलेल्या कबुलीनुसार, मयत तरुणाचे आपल्या मैत्रिणीशी अनैतिक संबंध असल्याचा त्याला संशय होता. याच रागातून त्याने आपल्या इतर तीन साथीदारांच्या मदतीने कट रचला.
१. मयताला कळंबोली येथून होंडा सिटी कारमध्ये जबरदस्तीने बसवून अपहरण केले.
२. कारमध्येच दोरीने त्याचे हातपाय बांधले आणि गळा आवळून खून केला.
३. त्यानंतर मृतदेह कारमधून सुखेड (ता. खंडाळा) हद्दीत आणला.
४. तेथे मृतदेहावर पेट्रोल ओतून पेटवून दिले आणि पुरावा नष्ट करण्यासाठी विहिरीत ढकलून दिले.
साखरवाडी आणि पुण्यातून साथीदार जेरबंद
मुख्य आरोपीच्या माहितीवरून लोणंदचे सपोनि शिवाजी जायपत्रे यांच्या पथकाने गुन्ह्यातील एका साथीदाराला साखरवाडी (ता. फलटण) येथून ताब्यात घेतले. तर अन्य दोन साथीदारांना एलसीबी आणि लोणंद पोलिसांच्या संयुक्त पथकाने पुणे येथून अटक केली.
तपास पथकाचे कौतुक
कुठलाही पुरावा नसताना केवळ ७२ तासांत हा संवेदनशील गुन्हा उघडकीस आणल्याबद्दल पोलीस अधीक्षक तुषार दोशी यांनी तपास पथकाचे अभिनंदन केले आहे. या कारवाईत पो.नि. अरुण देवकर, सपोनि रमेश गर्जे, सपोनि शिवाजी जायपत्रे, सपोनि रोहित फार्णे, पो.उ.नि. विश्वास शिंगाडे, पारितोष दातीर, रोहित हेगडे आणि त्यांच्या कर्मचाऱ्यांनी सहभाग घेतला.
