केसुर्डी येथे युवकाची आत्महत्या
दैनिक स्थैर्य | दि. १७ ऑक्टोबर २०२१ | खंडाळा | खंडाळा तालुक्यातील केसुर्डी गावच्या हद्दीमध्ये कचरेवाडा याठिकाणी 24 वर्षीय युवकाने नायलॉन दोरीने गुलमोहराच्या झाडाच्या फांदीला गळफास घेत आत्महत्या केली आहे.यामध्ये राहुल किसन कचरे (वय 24) असे आत्महत्या केलेल्या युवकाचे नाव आहे. दरम्यान, आत्महत्येचे कारण समजू शकलेले नाही.
याबाबतची शिरवळ पोलीसांनी दिलेली अधिक माहिती अशी कि, केसुर्डी ता.खंडाळा गावच्या हद्दीमध्ये कचरेवाडा नावाच्या शिवारामध्ये महादेव जानबा कचरे यांच्या मालकीची जमीन आहे. दरम्यान, संबंधित ठिकाणी किसन कचरे यांचीही मालकीची जमीन आहे. यावेळी गुरुवार दि. 14 ऑक्टोबर रोजी रात्री 9 वाजण्याच्या दरम्यान किसन कचरे यांचा मुलगा राहुल कचरे हा मेंढ्या राखण्याकरिता कचरेवाडा नावाच्या शिवारात गेला होता. दरम्यान, शुक्रवार दि.15ऑक्टोबर रोजी सकाळी 7 वाजण्याच्या दरम्यान महादेव कचरे यांच्या मालकीच्या जमिनीमध्ये असणार्‍या गुलमोहोराच्या झाडाच्या फांदीला राहुल कचरे याने नायलॉन दोरीच्या साहाय्याने गळफास घेतल्याचे निदर्शनास आले.
याबाबतची माहिती मिळताच तातडीने घटनास्थळी शिरवळ पोलीस स्टेशनचे पोलीस अंमलदार समाज जगताप,विनोद पवार हे दाखल झाले. यावेळी उपस्थित नागरिकांच्या साहाय्याने राहुल कचरे याचा मृतदेह शिरवळ येथील प्राथमिक आरोग्य केंद्र याठिकाणी आणण्यात आला. याप्रसंगी प्राथमिक आरोग्य केंद्र याठिकाणी राहुल कचरे याचा मृतदेहाचे शवविच्छेदन करीत मृतदेह नातेवाईकांच्या ताब्यात देण्यात आला. याबाबतची फिर्याद धुळाजी कचरे यांनी शिरवळ पोलीस स्टेशनला दिली असून अधिक तपास पोलीस अंमलदार संजय जगताप,विनोद पवार हे करीत आहे.
