चिमुकल्या हातांची मोठी मदत! विद्यार्थ्यांनी मसापला दिला संमेलन निधी; कामकाजाचीही घेतली माहिती
मराठा विद्या प्रसारक समाज संस्थेच्या विद्यार्थ्यांनी फलटण साहित्य परिषदेला भेट देऊन कामकाजाची माहिती घेतली. आगामी ९९ व्या साहित्य संमेलनासाठी विद्यार्थ्यांनी मदतनिधी सुपूर्द केला. वाचा सविस्तर.
स्थैर्य, फलटण, दि. ०९ डिसेंबर : पुस्तकी ज्ञानापलीकडे जाऊन विद्यार्थ्यांमध्ये वाचन संस्कृती रुजावी आणि त्यांना साहित्य विश्वाची ओळख व्हावी, या उद्देशाने फलटणमध्ये एक स्तुत्य उपक्रम राबवण्यात आला. मराठा विद्या प्रसारक समाज संस्थेच्या विद्यार्थ्यांनी नुकतीच महाराष्ट्र साहित्य परिषद (मसाप), फलटण शाखेला भेट दिली. यावेळी विद्यार्थ्यांनी केवळ परिषदेचे कामकाजच जाणून घेतले नाही, तर साताऱ्यात होणाऱ्या आगामी ९९ व्या अखिल भारतीय मराठी साहित्य संमेलनासाठी स्वतःहून खारीचा वाटा उचलत मदतनिधीही सुपूर्द केला.
साहित्य परिषदेच्या कामकाजाची ओळख
श्रीमती प्रेमलाकाकी प्राथमिक विद्यामंदिर आणि श्रीमती प्रेमलताई चव्हाण हायस्कूल व ज्युनिअर कॉलेजच्या विद्यार्थ्यांनी मसाप कार्यालयात जाऊन प्रत्यक्ष भेटीगाठी घेतल्या. यावेळी मसापचे अध्यक्ष रवींद्र बेडकिहाळ, कोषाध्यक्ष अलका बेडकिहाळ आणि ‘लोकजागर’चे संपादक रोहित वाकडे यांनी विद्यार्थ्यांचे उत्साहात स्वागत केले. मुलांना वाचनाची गोडी लागावी म्हणून त्यांना विविध पुस्तके भेट देण्यात आली. विद्यार्थ्यांनी पदाधिकाऱ्यांशी संवाद साधत साहित्य परिषदेचे कामकाज नेमके कसे चालते, याची सविस्तर माहिती करून घेतली.
९९ व्या संमेलनासाठी ‘९९९’ रुपयांची मदत
साताऱ्यात लवकरच ९९ वे अखिल भारतीय मराठी साहित्य संमेलन संपन्न होत आहे. या साहित्य सोहळ्यासाठी आपलाही हातभार लागावा, या भावनेतून विद्यार्थ्यांनी ‘९९९’ रुपयांचा प्रतिकात्मक सहाय्यता निधी रवींद्र बेडकिहाळ यांच्याकडे सुपूर्द केला. यावेळी बोलताना रवींद्र बेडकिहाळ म्हणाले,
“विद्यार्थ्यांना साहित्य परिषदेचे कामकाज कसे चालते हे समजण्यासाठी हा उपक्रम अत्यंत स्तुत्य आहे. यामुळे मुलांमध्ये वाचनाची गोडी निर्माण होईल आणि ते भविष्यात रसिक वाचक बनतील. संमेलनात मुलांना साहित्यिकांच्या प्रत्यक्ष भेटीगाठी आणि पुस्तक खरेदीची संधी मिळणार आहे.”
प्रा. रवींद्र कोकरेंचे कथाकथन ऐकण्यासाठी विद्यार्थी उत्सुक
विशेष अभिमानाची बाब म्हणजे, प्रशालेचे उपक्रमशील शिक्षक आणि ग्रामीण कथाकार प्रा. रवींद्र कोकरे हे या ९९ व्या साहित्य संमेलनात ‘निमंत्रित कथाकार’ म्हणून सहभागी होणार आहेत. आपल्या शिक्षकाचे कथाकथन ऐकण्यासाठी सर्व विद्यार्थी संमेलनाला उपस्थित राहणार आहेत. प्राचार्य रणदेव खराडे यांनी विद्यार्थ्यांना रसिक वाचक म्हणून संमेलनात सहभागी होण्यासाठी विशेष प्रोत्साहन दिले आहे.
या उपक्रमासाठी शिक्षक बापूसाहेब गायकवाड, सत्यजीत कदम, अभिजीत गायकवाड यांनी पुढाकार घेतला. यावेळी विद्यार्थी मोठ्या संख्येने उपस्थित होते. कोषाध्यक्ष अलका बेडकिहाळ यांनी विद्यार्थ्यांना बालकुमार साहित्य संमेलनाविषयी माहिती दिली.
