ब्लूम इंग्लिश मीडियम स्कूलच्या विद्यार्थ्यांचे राज्यस्तरीय अबॅकस परीक्षेत वर्चस्व; ४७ विद्यार्थी राष्ट्रीय स्पर्धेसाठी पात्र
स्थैर्य, फलटण, दि. १६ ऑक्टोबर : गुणवरे येथील ईश्वर कृपा शिक्षण प्रसारक मंडळ संचलित ब्लूम इंग्लिश मीडियम स्कूल अँड ज्युनियर कॉलेजच्या विद्यार्थ्यांनी राज्यस्तरीय अबॅकस आणि वेदिक मॅथ्स स्पर्धेत घवघवीत यश संपादन केले आहे. पुणे येथील उत्कर्ष क्रिएशनतर्फे आयोजित या स्पर्धेत शाळेच्या ४७ विद्यार्थ्यांची राष्ट्रीय पातळीवरील स्पर्धेसाठी निवड झाली असून, या यशाने शाळेच्या शिरपेचात मानाचा तुरा खोवला गेला आहे.
उत्कर्ष क्रिएशनतर्फे घेण्यात आलेल्या या राज्यस्तरीय स्पर्धेत ब्लूम इंग्लिश मीडियम स्कूलचे एकूण ५८ विद्यार्थी सहभागी झाले होते. या सर्वच विद्यार्थ्यांनी उल्लेखनीय कामगिरी करत विविध श्रेणींमध्ये यश मिळवले. यामध्ये ‘विनर वन’ रँकमध्ये २५ विद्यार्थ्यांनी, ‘विनर टू’ रँकमध्ये २२ विद्यार्थ्यांनी, तर ‘विनर थ्री’ रँकमध्ये १२ विद्यार्थ्यांनी यश संपादन करून आपले कौशल्य सिद्ध केले.
या स्पर्धेतील देदीप्यमान कामगिरीच्या जोरावर एकूण ४७ विद्यार्थ्यांची पुढील महिन्यात पुणे येथे होणाऱ्या राष्ट्रीय अबॅकस आणि वेदिक मॅथ्स स्पर्धेसाठी निवड झाली आहे. एकाच शाळेतील इतक्या मोठ्या संख्येने विद्यार्थ्यांची राष्ट्रीय स्पर्धेसाठी निवड होण्याची ही तालुक्यातील एक महत्त्वाची कामगिरी मानली जात आहे.
या यशस्वी विद्यार्थ्यांचे संस्थेचे अध्यक्ष ईश्वर तात्या गावडे, अकलूजचे सहाय्यक प्रादेशिक परिवहन अधिकारी (वर्ग-१) संभाजी गावडे, संस्थेच्या सचिव साधना गावडे, शाळेचे प्राचार्य गिरिधर गावडे, उपप्राचार्या पुनम जाधव आणि व्यवस्थापिका सोनाली मोरे यांनी अभिनंदन केले. तसेच, स्पर्धेचे आयोजक उत्कर्ष क्रिएशनचे अध्यक्ष अमित शिंदे, संचालिका संध्या शिंदे आणि अबॅकस शिक्षिका गौंड यांनीही विद्यार्थ्यांच्या कामगिरीचे कौतुक केले.
यशस्वी विद्यार्थ्यांचा शाळेत ट्रॉफी आणि प्रमाणपत्र देऊन सत्कार करण्यात आला. यावेळी राष्ट्रीय स्पर्धेसाठी निवड झालेल्या विद्यार्थ्यांना शुभेच्छा देण्यात आल्या. विद्यार्थ्यांच्या या यशामुळे पालकांमध्ये आणि गुणवरे परिसरात आनंदाचे वातावरण आहे.
अबॅकस आणि वेदिक मॅथ्समुळे विद्यार्थ्यांची केवळ गणितीय क्षमताच वाढत नाही, तर त्यांची एकाग्रता, स्मरणशक्ती आणि आत्मविश्वास वाढण्यासही मदत होते. ब्लूम स्कूलने घेतलेल्या या पुढाकारामुळे विद्यार्थ्यांच्या सर्वांगीण विकासाला चालना मिळत असल्याचे दिसून येत आहे.
