मंगळवार पेठेतील सामाजिक कार्यकर्ते सागर सोरटे यांचा महायुतीत प्रवेश; समशेरदादांना मोठे बळ
स्थैर्य, फलटण, दि. १८ नोव्हेंबर : फलटण नगरपरिषद निवडणुकीच्या रणधुमाळीत महायुतीला मंगळवार पेठेत मोठे बळ मिळाले आहे. येथील प्रसिद्ध सामाजिक कार्यकर्ते सागर सोरटे यांनी आपल्या असंख्य कार्यकर्त्यांसह महायुतीत जाहीर प्रवेश केला. यामुळे या भागातील राजकीय समीकरणे महायुतीसाठी अधिक अनुकूल झाली आहेत.
या पक्षप्रवेश सोहळ्यासाठी महायुतीचे प्रमुख नेते उपस्थित होते. माजी खासदार रणजितसिंह नाईक निंबाळकर, आमदार सचिन पाटील, सातारा जिल्हा बँकेचे संचालक शिवरूपराजे खर्डेकर आणि महायुतीचे नगराध्यक्षपदाचे अधिकृत उमेदवार समशेरसिंह नाईक निंबाळकर यांच्या प्रमुख उपस्थितीत हा कार्यक्रम पार पडला.
सागर सोरटे यांच्यासोबत केतन सोरटे, धीरज सोरटे, अंश काकडे आणि मंगळवार पेठेतील अनेक प्रमुख कार्यकर्त्यांनी महायुतीमध्ये प्रवेश केला. मान्यवर नेत्यांनी त्यांचे पक्षात स्वागत केले आणि आगामी निवडणुकीत पूर्ण ताकदीने काम करण्याचे आवाहन केले.
यावेळी बोलताना माजी खासदार रणजितसिंह नाईक निंबाळकर यांनी सांगितले की, सागर सोरटे यांच्यासारख्या तळागाळात काम करणाऱ्या कार्यकर्त्यांच्या प्रवेशामुळे पक्षाची ताकद वाढली आहे. नगराध्यक्षपदाचे उमेदवार समशेरसिंह नाईक निंबाळकर यांच्या विजयासाठी हा प्रवेश महत्त्वपूर्ण ठरेल, असा विश्वास त्यांनी व्यक्त केला.
मंगळवार पेठ हा राजकीयदृष्ट्या महत्त्वाचा भाग मानला जातो. या भागात सागर सोरटे आणि त्यांच्या सहकाऱ्यांचा चांगला जनसंपर्क आहे. त्यांच्या प्रवेशामुळे महायुतीच्या उमेदवारांना प्रचारात मोठी आघाडी मिळेल, असे चित्र निर्माण झाले आहे.
या कार्यक्रमास युवा नेते अभिजीत नाईक निंबाळकर आणि राष्ट्रवादी काँग्रेसचे शहराध्यक्ष राहुल निंबाळकर यांचीही विशेष उपस्थिती होती. त्यांनी नवनिर्वाचित कार्यकर्त्यांना शुभेच्छा दिल्या.
यावेळी मंगळवार पेठेतील महायुतीचे सर्व नगरसेवक पदाचे उमेदवार आणि कार्यकर्ते मोठ्या संख्येने उपस्थित होते. कार्यकर्त्यांच्या घोषणाबाजीने परिसर दुमदुमून गेला होता.
