श्रीमंत संजीवराजेंच्या एकसष्टीपूर्तीनिमित्त तालुक्यात सामाजिक उपक्रम; उत्सवाला फाटा देत मदतीचा हात
स्थैर्य, राजाळे, दि. १० ऑक्टोबर, सुजित निंबाळकर : फलटण एज्युकेशन सोसायटीचे सेक्रेटरी संजीवराजे नाईक निंबाळकर यांच्या एकसष्टीपूर्तीनिमित्त (६१ वा वाढदिवस), नियोजित सोहळा रद्द करून त्यांच्या आवाहनाला प्रतिसाद देत संपूर्ण फलटण तालुक्यात विविध सामाजिक, शैक्षणिक आणि आरोग्य विषयक उपक्रमांचे आयोजन करण्यात आले. उत्सवी स्वरूपाला फाटा देत, राज्यातील पूरग्रस्तांना मदत करण्यावर या उपक्रमांचा मुख्य भर होता.
पूरग्रस्तांसाठी मदतीचा ओघ
आमदार श्रीमंत रामराजे नाईक निंबाळकर यांच्या मार्गदर्शनाखाली आणि माजी आमदार दीपक चव्हाण यांच्या आवाहनानुसार, फलटण-कोरेगाव मतदारसंघातून पूरग्रस्तांसाठी मदत संकलित करण्यात आली. यामध्ये सहकारी संस्था, ग्रामपंचायती आणि नागरिकांनी जीवनावश्यक वस्तू, धान्य आणि कपड्यांच्या स्वरूपात मदत दिली. मुधोजी महाविद्यालयानेही मदत संकलन उपक्रम राबवून मोठा प्रतिसाद मिळवला.
आरोग्य आणि शैक्षणिक उपक्रम
वाढदिवसानिमित्त तालुक्यात विविध ठिकाणी रक्तदान आणि आरोग्य तपासणी शिबिरे आयोजित करण्यात आली. श्रीमंत शिवाजीराजे उद्यानविद्या महाविद्यालय व कृषी महाविद्यालय आणि फलटण ब्लड बँक यांच्या संयुक्त विद्यमाने रक्तदान शिबिर घेण्यात आले, तर श्रीमंत महाराणीसाहेब लक्ष्मीदेवी इन्स्टिट्यूट ऑफ नर्सिंग सायन्समध्ये आरोग्य तपासणी शिबिर संपन्न झाले.
याचबरोबर, अभियांत्रिकी महाविद्यालयात ‘इनोव्हेशन २०२५’ या राष्ट्रीय स्तरावरील प्रोजेक्ट स्पर्धेचे आयोजन करण्यात आले, ज्यात ८ राज्यांतील २६०० हून अधिक विद्यार्थी सहभागी झाले होते.
शाळांमध्येही विविध कार्यक्रम
विद्यानगर येथील श्रीमंत निर्मादेवी प्राथमिक विद्यामंदिरमध्ये ‘वहीतुला’, खो-खो क्रीडांगण पूजन आणि वृक्षारोपण असे कार्यक्रम पार पडले. ‘वहीतुला’ उपक्रमात मिळालेल्या वह्या गरजू विद्यार्थ्यांना देण्यात येणार असल्याचे मुख्याध्यापिका वैशाली जाधव यांनी सांगितले. तसेच, फलटण जिमखाना व श्रीमंत शिवाजीराजे इंग्लिश मीडियम स्कूलच्या वतीने ‘रॉयल फुटबॉल चॅम्पियन’ स्पर्धेचे आयोजन करण्यात आले होते, ज्यात ३६ संघांनी सहभाग घेतला.
