राष्ट्रवादीच्या फलटण तालुकाध्यक्षपदी श्रीमंत शिवरूपराजे; अशी आहे शिवरूपराजे यांची राजकीय वाटचाल

दैनिक स्थैर्य | दि. 31 जानेवारी 2025 | फलटण | राष्ट्रवादी काँग्रेस पार्टीच्या फलटण तालुकाध्यक्ष पदी श्रीमंत शिवरूपराजे खर्डेकर यांची नियुक्ती करण्यात आली आहे. याबाबत राष्ट्रवादी काँग्रेस पार्टीच्या सातारा कार्यालयात राज्यसभा खासदार नितीनकाका पाटील व जिल्हाध्यक्ष बाळासाहेब सोळस्कर यांच्या हस्ते नियुक्ती पत्र प्रदान करण्यात आले आहे. उपमुख्यमंत्री ना. अजितदादा पवार यांच्या आदेशाने फलटण तालुकाध्यक्ष पदी श्रीमंत शिवरूपराजे खर्डेकर यांची नियुक्ती करण्यात आली आहे.

– श्रीमंत शिवरूपराजेंचा राजकीय वाटचाल –

• फलटण कृषी उत्पन्न समिती, संचालक – २००४

• फलटण पंचायत समिती, सदस्य व गटनेते – २००७

• फलटण तालुका खरेदी विक्री संघाच्या संचालक सन २०१० ते अद्याप

• फलटण पंचायत समिती, सदस्य – २०१७

• फलटण पंचायत समिती, उपसभापती – २०१७

• फलटण पंचायत समिती, सभापती – २०१९

• सातारा जिल्हा मध्यवर्ती बँक, संचालक – २०१९ (श्रीमंत दादाराजे खर्डेकर यांच्या निधनाने रिक्त झालेल्या जागेवर)

• सातारा जिल्हा मध्यवर्ती बँक, संचालक – २०२१

• फलटण कृषी उत्पन्न समिती, संचालक – २०२३

• (२०२४ साली झालेल्या लोकसभा व विधानसभा निवडणुकीत उपमुख्यमंत्री ना. अजितदादा पवार यांच्या नेतृत्वाखाली महायुतीचे कामकाज केले आहे)

• फलटण तालुका राष्ट्रवादी काँग्रेस पार्टी, अध्यक्ष – २०२५

गत काही दिवसांपासून राजे गट पुन्हा उपमुख्यमंत्री ना. अजितदादा पवार यांच्या नेतृत्वात कार्यरत राहणार असल्याच्या विविध चर्चा ह्या फलटण शहरासह तालुक्यात रंगू लागल्या होत्या. त्यामध्येच राष्ट्रवादी काँग्रेस पक्षाच्या शिर्डी येथे झालेल्या अधिवेशनात आमदार श्रीमंत रामराजे नाईक निंबाळकर यांनी उपमुख्यमंत्री ना. अजितदादा पवार यांची भेट घेतली होती. त्यानंतर या आठवड्यातील मंगळवारी उपमुख्यमंत्री ना. अजितदादा पवार यांच्या मुंबई येथील देवगिरी या निवासस्थानी झालेल्या बैठकीत आमदार श्रीमंत रामराजे नाईक निंबाळकर यांची सुद्धा उपस्थिती दिसल्याने अनेकांनी भुवया उंचावल्या होत्या.

या बैठकीच्या पूर्वी श्रीमंत शिवरूपराजे खर्डेकर व माजी खासदार रणजितसिंह नाईक निंबाळकर यांनी मुख्यमंत्री ना. देवेंद्र फडणवीस, उपमुख्यमंत्री ना. अजितदादा पवार, राष्ट्रवादीचे प्रदेशाध्यक्ष तथा खासदार सुनील तटकरे यांची सदिच्छा भेट घेतली होती. व लगेचच दोन दिवसात श्रीमंत शिवरूपराजे खर्डेकर यांची राष्ट्रवादी काँग्रेस पार्टीच्या फलटण तालुकाध्यक्ष पदी निवड झाल्याने उपमुख्यमंत्री ना. अजितदादा पवार यांनी फलटण तालुक्यातील जनतेला योग्य तो सल्ला दिला आहे.