शिवेंद्रराजेंचा सर्वात सेफ मतदार संघ : श्रीमंत रामराजे

दैनिक स्थैर्य । दि. 11 आक्टोंबर 2024 । फलटण । आगामी विधानसभा निवडणूकीच्या दृष्टीने जिल्ह्यातील सर्वच नेतेमंडळी ही आपापल्या मतदार संघामध्ये कामाला लागलेली आहेत. संपूर्ण जिल्ह्याचा विचार करता श्रीमंत छत्रपती शिवेंद्रसिंह राजे भोसले यांचा मतदारसंघ हा त्यांच्यासाठी सेफ मतदार संघ असल्याचे मत विधान परिषदेचे माजी सभापती तथा विद्यमान आमदार श्रीमंत रामराजे नाईक निंबाळकर यांनी व्यक्त केले.

फलटण येथे श्रीमंत छत्रपती संभाजीराजे भोसले यांच्या पूर्णाकृती पुतळ्याच्या अनावरण कार्यक्रमामध्ये श्रीमंत रामराजे बोलत होते यावेळी आ. श्रीमंत छत्रपती शिवेंद्रसिंहराजे भोसले, आ. दिपक चव्हाण, भवानीसिंह घोरपडे, श्रीमंत सुभद्राराजे नाईक निंबाळकर, जिल्हा परिषदेचे माजी अध्यक्ष श्रीमंत संजीवराजे नाईक निंबाळकर, श्रीमंत विश्वजीतराजे नाईक निंबाळकर यांच्यासह पुतळा समितीचे पदाधिकारी व मान्यवर मोठ्या संख्येने उपस्थित होते.

यावेळी बोलताना श्रीमंत रामराजे म्हणाले की, आजचे व्यासपीठ हे राजकीय व्यासपीठ नसून निवडणूक असून सुध्दा या व्यासपीठावरुन टिकाटिपणी करणे योग्य नाही. आगामी काळामध्ये फलटण शहरामध्ये सर्वच महापुरुषांचे पुर्णाकृती पुतळे बसविण्या संदर्भात आपण कार्यवाही केली आहे.