जगातील सर्वात बुटकी ‘राधा’ म्हैस आणि आधुनिक तंत्रज्ञानाचे आकर्षण; मालोजीराजे कृषी प्रदर्शनाला २५ हजार शेतकऱ्यांची भेट

श्रीमंत अनिकेतराजे नाईक निंबाळकर यांची प्रदर्शनाला भेट; फलटणमध्ये कृषी महोत्सवाला उदंड प्रतिसाद

स्थैर्य, फलटण, दि. 27 डिसेंबर : फलटण एज्युकेशन सोसायटी संचलित श्रीमंत शिवाजीराजे उद्यानविद्या महाविद्यालय व कृषी महाविद्यालय, फलटण आयोजित ‘श्रीमंत मालोजीराजे कृषी प्रदर्शन २०२५’ ला फलटणसह परिसरातील शेतकऱ्यांनी भरभरून प्रतिसाद दिला आहे. प्रदर्शनाच्या तिसऱ्या दिवसापर्यंत तब्बल २५,००० शेतकऱ्यांनी या कृषी महोत्सवाला भेट दिली असून, आधुनिक शेती तंत्रज्ञान आणि प्रदर्शनाचे खास आकर्षण असलेली जगातील सर्वात बुटकी ‘राधा’ म्हैस पाहण्यासाठी गर्दी होत आहे.

प्रदर्शनाच्या दुसऱ्या आणि तिसऱ्या दिवशी विविध स्टॉल्सवर शेतकऱ्यांची झुंबड उडाली होती. यामध्ये प्रामुख्याने खालील गोष्टींचे आकर्षण ठरले:

• बायर क्रॉप सायन्स: शेतकऱ्यांसाठी मोफत निमॅटोड तपासणी सुविधा.

  

• राधा म्हैस: जगातील सर्वात बुटकी म्हैस पाहण्यासाठी आबालवृद्धांची गर्दी.

  

• पाडेगाव संशोधन केंद्र: उसाचे सुधारित वाण आणि त्यांच्या वैशिष्ट्यांची माहिती.

  

• कृषी विभाग: भाजीपाला, फळबाग, पिकांचे सुधारित वाण, आधुनिक शेती पद्धती आणि शेततळे तंत्रज्ञान.

• महाविद्यालयीन स्टॉल्स: विद्यार्थ्यांनी ‘अनुभवाधारित कृषी शिक्षण’ उपक्रमांतर्गत बनवलेल्या विविध कृषी निविष्ठा.

• के. बी. क्रॉप सायन्स: सेंद्रिय खते, जैविक कीटकनाशक आणि जैविक बुरशीनाशके.

• रोपवाटिका: विविध भाजीपाला आणि फळबाग रोपे.

श्रीमंत अनिकेतराजे यांची भेट

प्रदर्शनाच्या तिसऱ्या दिवशी सायंकाळी फलटण नगरपरिषदेचे माजी नगरसेवक आणि संस्थेच्या गव्हर्निंग कौन्सिलचे सदस्य श्रीमंत अनिकेतराजे नाईक निंबाळकर यांनी प्रदर्शनाला सदिच्छा भेट दिली. त्यांनी प्रदर्शनातील विविध स्टॉल्सची पाहणी करून सविस्तर माहिती घेतली. यावेळी कृषी प्रदर्शन आयोजन समितीच्या वतीने त्यांचा यथोचित सन्मान करण्यात आला.

शेतकऱ्यांचा उदंड प्रतिसाद

प्रदर्शनाच्या दुसऱ्या दिवशी १०,००० तर तिसऱ्या दिवसाअखेर एकूण २५,००० हून अधिक शेतकरी, युवक, महिला बचत गट आणि महिला शेतकऱ्यांनी प्रदर्शनाला भेट दिली आहे. या प्रदर्शनाद्वारे उपलब्ध झालेले आधुनिक तंत्रज्ञान आणि माहितीचा लाभ परिसरातील सर्व शेतकऱ्यांनी घ्यावा, असे आवाहन आयोजकांच्या वतीने करण्यात आले आहे.