ढोल-ताशांच्या गजरात ‘शिवमय’ फलटण! इंजिनिअरिंग कॉलेजमध्ये शिवजन्मोत्सवाचा दिमाखदार जल्लोष
फलटण एज्युकेशन सोसायटीच्या कॉलेज ऑफ इंजिनिअरिंगमध्ये शिवजन्मोत्सव मोठ्या उत्साहात. ढोल-ताशा, लेझीम, लाठी-काठी प्रात्यक्षिके आणि शिवचरित्र व्याख्यानाने रंगला सोहळा.
स्थैर्य, फलटण, दि. १९ फेब्रुवारी : फलटण एज्युकेशन सोसायटीच्या फलटण एज्युकेशन सोसायटीचे कॉलेज ऑफ इंजिनिअरिंग येथे यंदाचा शिवजन्मोत्सव सोहळा मोठ्या दिमाखात आणि उत्साहात साजरा करण्यात आला. ढोल-ताशांचा कडकडाट, लेझीमचा ताल आणि लाठी-काठीच्या थरारक प्रात्यक्षिकांनी संपूर्ण परिसर शिवमय झाला होता.
आज सकाळी महाविद्यालयाच्या आवारात विद्यार्थी आणि प्राध्यापक पारंपरिक वेशभूषेत एकत्र आले. मुलांनी पांढरे कुर्ते-पायजमे, डोक्यावर भगवे फेटे परिधान केले होते, तर मुलींनी नऊवारी साड्यांत शिवकालीन संस्कृतीची झलक साकारली होती. भगव्या ध्वजांच्या साक्षीने निघालेल्या भव्य मिरवणुकीने शहरवासीयांचे लक्ष वेधून घेतले.
मिरवणुकीच्या अग्रभागी विद्यार्थ्यांनी सादर केलेला लेझीम खेळ विशेष आकर्षण ठरला. ढोल-ताशांच्या तालावर शिस्तबद्ध पावले टाकत विद्यार्थ्यांनी उपस्थितांची मने जिंकली.
शिवकालीन युद्धकलेचे जतन करत विद्यार्थ्यांनी लाठी-काठी व तलवारबाजीची चित्तथरारक प्रात्यक्षिके सादर केली. ‘जय भवानी, जय शिवाजी’च्या घोषणांनी परिसर दुमदुमून गेला.
मिरवणुकीनंतर आयोजित विशेष सत्रात शिवचरित्रावर आधारित व्याख्यान झाले. प्रमुख वक्त्यांनी छत्रपती शिवाजी महाराज यांच्या स्थापत्यशास्त्रातील दूरदृष्टीवर प्रकाश टाकला. “गड-किल्ल्यांची उभारणी करताना वापरलेले तंत्रज्ञान आजच्या आधुनिक इंजिनिअर्ससाठी अभ्यासाचा विषय आहे,” असे मत व्यक्त करण्यात आले.
तंत्रज्ञान शिक्षण घेत असलेल्या विद्यार्थ्यांना शिवरायांच्या व्यवस्थापनकौशल्य, धैर्य आणि रणनीतीतून प्रेरणा घेण्याचे आवाहन करण्यात आले.
कार्यक्रमाच्या शेवटी महाराजांची आरती करण्यात आली. या सोहळ्यास फलटण एज्युकेशन सोसायटीचे ट्रेझरर हेमंत रानडे, गव्हर्निंग कौन्सिल सदस्य शिरीष दोशी, चंद्रकांत पाटील, पराग दोशी, प्रशासन अधिकारी अरविंद निकम सर तसेच महाविद्यालयाचे प्राचार्य डॉ. मनोजकुमार दळवी उपस्थित होते.
तंत्रज्ञानाच्या शिक्षणासोबत सांस्कृतिक वारसा जपण्याचा हा उपक्रम फलटणमध्ये चर्चेचा विषय ठरला असून विद्यार्थ्यांच्या देशभक्ती व परंपरेप्रती असलेल्या अभिमानाचे दर्शन घडवणारा ठरला आहे.
