“मी जनतेचा प्रतिनिधी, कुठल्या राजघराण्याचा नाही; फलटणमध्ये २७-० असा निकाल लागणार!” – समशेरसिंह

• रामराजेंनी ३० वर्षांत शहराचा विकास करण्याऐवजी स्वतःचे उत्पन्न वाढवले: समशेरसिंह

• जनता यावेळी ‘राजा’ला नाही, तर सर्वसामान्यांच्या प्रतिनिधीला निवडेल

• ५० बेडचे हॉस्पिटल आणि नाट्यगृह उभारण्याचा संकल्प

स्थैर्य, फलटण, दि. 21 नोव्हेंबर : “फलटणमध्ये मी जनतेचा प्रतिनिधी म्हणून निवडणूक लढवत आहे, कुठल्या राजघराण्याचा नाही. रामराजे ३० वर्षांपासून फलटणमध्ये सत्तेत आहेत, पण त्यांनी शहराचा विकास करण्याऐवजी फक्त स्वतःचा आणि कुटुंबाचा फायदा करून घेतला. यावेळी फलटणची जनता ‘राजा’ नाही, तर सर्वसामान्यांना ‘राजा’ मानणाऱ्या माणसाला निवडेल आणि नगरपालिकेत २७-० असा निकाल लागेल,” असा जोरदार विश्वास भाजपचे नगराध्यक्षपदाचे उमेदवार समशेरसिंह नाईक निंबाळकर यांनी व्यक्त केला.

फलटण नगरपरिषदेच्या निवडणुकीच्या पार्श्वभूमीवर एका वृत्त वाहिनीला दिलेल्या विशेष मुलाखतीत ते बोलत होते. यावेळी त्यांनी रामराजे नाईक निंबाळकर आणि अनिकेतराजे यांच्यावर सडकून टीका केली.

१५ वर्षांच्या अनुभवाची शिदोरी

समशेरसिंह म्हणाले, “ही निवडणूक माझ्यासाठी नवीन नाही. गेल्या १५-२० वर्षांपासून मी समाजकारणात कार्यरत आहे. १० वर्षे नगरसेवक आणि विरोधी पक्षनेता म्हणून काम केल्याने माझा जनसंपर्क दांडगा आहे. त्यामुळे मला निवडणुकीसाठी वेगळी तयारी करण्याची गरज नाही.”

‘राजा’ विरुद्ध ‘जनता’ संघर्ष

विरोधकांच्या मानसिकतेवर टीका करताना समशेरसिंह म्हणाले, “फॉर्म भरून आल्यावर अनिकेतराजेंनी ‘समशेरसिंह धनी आहेत आणि आम्ही राजे आहोत’ असे विधान केले. लोकशाहीत ज्यांनी जनतेला राजा मानले पाहिजे, ते आजही स्वतःलाच राजा समजतात, हे फलटणचे दुर्दैव आहे. मी जनतेचा सेवक आहे, मला राजशाही गाजवायची नाही.”

३० वर्षांचा हिशोब आणि ‘ओपन स्पेस’चा आरोप

रामराजेंच्या कारभारावर प्रहार करताना त्यांनी गंभीर आरोप केले. “रामराजे आणि त्यांच्या कुटुंबाने फलटणमधील मोकळ्या जागा (Open Spaces) गिळंकृत केल्या आणि त्या बिल्डरांच्या घशात घालून स्वतःचे उत्पन्न वाढवले. शहरात मुलांसाठी एकही चांगले मैदान नाही. छत्रपती शिवाजी महाराजांच्या वाचनालयाची दुरवस्था झाली आहे. रामराजेंनी फलटणला केवळ स्वतःच्या उत्पन्नाचे साधन बनवले आहे,” असे टीकास्त्र त्यांनी सोडले.

मलठण वि. रामराजेंचा वॉर्ड

आमच्यावर टीका करण्यापेक्षा विरोधकांनी स्वतःच्या वॉर्डाकडे पहावे, असे आव्हान देत समशेरसिंह यांनी मलठण (मह्दपुरा पेठ) विकासाचे मॉडेल मांडले. “आमच्या मलठण भागात सिमेंटचे रस्ते, वेळेवर पाणीपुरवठा आणि सुशोभित मंदिरे आहेत. याउलट, रामराजे स्वतः ज्या वॉर्डात राहतात, तिथे साधी गटार व्यवस्थाही नाही. हेच त्यांचे ३० वर्षांचे अपयश आहे,” असे त्यांनी स्पष्ट केले.

दहशतीचा नॅरेटिव्ह खोटा

विरोधकांकडून होत असलेल्या दहशतीच्या आरोपांचे त्यांनी खंडन केले. “स्वतःचा विकास दाखवण्यासाठी काहीच नसल्याने रामराजे आमच्यावर दहशतीचे खोटे आरोप करून जनतेची दिशाभूल करत आहेत. मात्र, लोकसभेला मिळालेले ७४ टक्के मतदान हे जनतेच्या विश्वासाचे प्रतीक आहे,” असे त्यांनी सांगितले.

विकासाचा ‘व्हिजन मॅप’

नगराध्यक्ष झाल्यावर काय करणार, याचा आराखडाही त्यांनी मांडला:

• पाणी व रस्ते: शहर खड्डेमुक्त करणे आणि पाण्याचे योग्य नियोजन.

• क्रीडा व संस्कृती: मुलांसाठी मैदाने, नाना-नानी पार्क, तारांगण आणि बंद पडलेले नाट्यगृह पुन्हा सुरू करणे.

• आरोग्य: नगरपालिकेचे स्वतःचे सुसज्ज ५० ते १०० बेडचे हॉस्पिटल उभारणे.