सातारा हिल हाफ मॅरेथॉनसाठी ६ एप्रिलपासून नोंदणी; सातारकरांना प्रवेश शुल्कात ३० टक्के सवलत

 धावपटूंची आवडती ‘सातारा हिल हाफ मॅरेथॉन’ यंदा ६ सप्टेंबरला रंगणार आहे. या स्पर्धेसाठी ६ एप्रिलपासून दोन टप्प्यांत ऑनलाइन नोंदणी सुरू होत असून, सातारकरांसाठी ३० टक्के सवलत जाहीर करण्यात आली आहे.

 स्थैर्य, सातारा, दि. ५ एप्रिल : धावपटूंच्या विशेष पसंतीस उतरलेली ‘सातारा हिल हाफ मॅरेथॉन’ यंदा ६ सप्टेंबर रोजी पार पडणार आहे. या बहुप्रतिक्षित आणि प्रतिष्ठेच्या स्पर्धेत सहभागी होण्यासाठीची ऑनलाइन नोंदणी सोमवारपासून (दि. ६ एप्रिल) दोन टप्प्यांत सुरू होणार असल्याची माहिती संयोजन समितीचे अध्यक्ष उपेंद्र पंडित आणि रेस डायरेक्टर डॉ. अविनाश शिंदे यांनी दिली.

नोंदणीची प्रक्रिया दोन टप्प्यांत :

• पहिला टप्पा (पूर्वनोंदणी) : ६ एप्रिलला पहाटे ६ वाजल्यापासून ते ९ एप्रिल सायंकाळी ६ वाजेपर्यंत धावपटूंना www.runsatara.com या अधिकृत संकेतस्थळावर पूर्वनोंदणी करता येईल.

  

  • नोंदणीसाठी एका ई-मेल आणि एका मोबाईल क्रमांकावरून फक्त एकच नोंदणी करता येईल.

    

  • ज्या धावपटूंनी गतवर्षी मॅरेथॉनसाठी नोंदणी केली होती, त्यांची प्रोफाईल माहिती संयोजकांकडे आधीच उपलब्ध आहे. त्यामुळे त्यांना नाव, पत्ता, मोबाईल क्रमांक, आधार क्रमांक पुन्हा भरण्याची आवश्यकता नाही.

    

  • यंदा केवळ टी-शर्टची साईज आणि गेल्या वर्षी किती वेळात स्पर्धा पूर्ण केली, ही माहिती भरावयाची आहे.

    

  • महत्त्वाची सूचना: या पहिल्या टप्प्यात धावपटूंनी प्रोफाईल तयार करून केवळ पूर्वनोंदणी करावी, या वेळी कोणतेही शुल्क भरू नये.

  • दुसरा टप्पा (शुल्क भरणे आणि प्रवेश निश्चिती) :

    ज्या धावपटूंनी पहिला टप्पा यशस्वीरीत्या पूर्ण केला आहे, त्यांनाच १२ एप्रिलला सकाळी ६ वाजल्यापासून शुल्क भरून आपला प्रवेश निश्चित करता येईल.

आधारकार्ड अनिवार्य आणि सातारकरांना ३०% सवलत

मॅरेथॉनच्या नोंदणीसाठी आधारकार्ड अनिवार्य करण्यात आले आहे. विशेष बाब म्हणजे, ज्या धावपटूंच्या आधारकार्डवर सातारा जिल्ह्याचा पत्ता आहे, त्यांना प्रवेश शुल्कात तब्बल ३० टक्के सवलत देण्यात येणार आहे.

मोफत प्रशिक्षण कार्यक्रम

नोंदणीकृत धावपटूंची तयारी उत्तम व्हावी यासाठी संयोजकांतर्फे १७ मे पासून १६ आठवड्यांचा मोफत प्रशिक्षण कार्यक्रम आयोजित करण्यात आला आहे. नोंदणी आणि स्पर्धेबाबत अधिक माहितीसाठी धावपटूंनी संकेतस्थळाला भेट द्यावी, असे आवाहन उपेंद्र पंडित व डॉ. अविनाश शिंदे यांनी केले आहे.