सासकलच्या सरपंचांना ‘दीर’प्रेम नडले! सौ. उषाताई फुले सरपंच पदावरून अपात्र; पुणे विभागीय आयुक्तांचा मोठा निर्णय

• सासकल (ता. फलटण) ग्रामपंचायतीच्या सरपंच सौ. उषाताई राजेंद्र फुले अपात्र घोषित

• सख्ख्या दिराला ग्रामपंचायतीच्या पाणीपुरवठा दुरुस्तीचे काम दिल्याचे प्रकरण भोवले

• जिल्हाधिकाऱ्यांचा आदेश रद्द करत अतिरिक्त विभागीय आयुक्त कविता द्विवेदी यांचा निकाल

• दिनेश मुळीक यांनी केला होता कायदेशीर पाठपुरावा

स्थैर्य, फलटण, दि. २९ नोव्हेंबर : फलटण तालुक्यातील सासकल ग्रामपंचायतीच्या विद्यमान सरपंच सौ. उषाताई राजेंद्र फुले यांना आपल्या पदाचा गैरवापर करणे आणि जवळच्या नातेवाईकाला आर्थिक लाभ मिळवून देणे चांगलेच महागात पडले आहे. आपल्या सख्ख्या दिराला ग्रामपंचायतीचे काम देऊन आर्थिक हितसंबंध जपल्याच्या कारणावरून पुणे विभागाच्या अतिरिक्त विभागीय आयुक्त कविता द्विवेदी यांनी त्यांना सरपंच आणि सदस्य पदावरून अपात्र घोषित केले आहे. या निकालामुळे फलटणच्या राजकीय वर्तुळात खळबळ उडाली आहे.

नेमके प्रकरण काय?

सासकल येथील सामाजिक कार्यकर्ते दिनेश दत्तात्रय मुळीक यांनी सरपंच उषाताई फुले यांच्या विरोधात जिल्हाधिकारी, सातारा यांच्याकडे तक्रार दाखल केली होती. सरपंच पदावर असताना उषाताई फुले यांनी त्यांचे सख्खे दीर वसंत बाबुराव फुले यांना ग्रामपंचायतीच्या नळपाणी पुरवठा योजनेच्या दुरुस्तीचे काम दिले होते. या कामाचा मोबदला म्हणून ग्रामपंचायतीच्या निधीतून त्यांना एकूण १०,३०० रुपये अदा करण्यात आले होते. महाराष्ट्र ग्रामपंचायत अधिनियम १९५९ च्या कलम १४ (१) (ग) नुसार सदस्याने स्वतःच्या किंवा नातेवाईकाच्या नावे ग्रामपंचायतीशी कोणताही आर्थिक व्यवहार किंवा करार करणे, हे अपात्रतेचे कारण ठरते.

जिल्हाधिकाऱ्यांचा आदेश रद्द

सुरुवातीला जिल्हाधिकारी, सातारा यांनी ११ ऑगस्ट २०२५ रोजी दिनेश मुळीक यांचा अर्ज फेटाळून लावला होता. या निर्णयाविरोधात मुळीक यांनी पुणे येथील अतिरिक्त विभागीय आयुक्तांकडे अपील दाखल केले होते. यावर सुनावणी होऊन, कागदपत्रांचे अवलोकन केल्यानंतर अतिरिक्त आयुक्त कविता द्विवेदी यांनी जिल्हाधिकाऱ्यांचा तो आदेश रद्दबातल ठरवला.

विभक्त असले तरी ‘हितसंबंध’ सिद्ध

सुनावणी दरम्यान सरपंचांनी बचाव करताना सांगितले की, “मी आणि माझे दीर वसंत फुले हे गेल्या १७ वर्षांपासून विभक्त राहतो, आमची रेशनकार्ड आणि मालमत्ता वेगळी आहे.” मात्र, न्यायालयाने हे स्पष्ट केले की, जरी कुटुंब विभक्त असले तरी, जवळच्या नातेवाईकाला (दिराला) काम देऊन त्यांना ग्रामपंचायतीच्या निधीतून रक्कम अदा केली आहे. यामुळे सरपंचांचा या व्यवहारात ‘अप्रत्यक्षरित्या हितसंबंध’ (Indirect Interest) असल्याचे सिद्ध होते.

कलम १४ (१) (ग) चा भंग

सरपंच उषाताई फुले यांनी पदाचा दुरुपयोग करून नातेवाईकाला लाभ दिल्याचे सिद्ध झाल्याने, महाराष्ट्र ग्रामपंचायत अधिनियम १९५९ च्या कलम १४ (१) (ग) व १६ (२) अन्वये त्यांना ग्रामपंचायतीच्या सरपंच व सदस्य पदावर राहण्यास अपात्र घोषित करण्यात आले आहे. या निकालाची प्रत सर्व संबंधितांना पाठवण्यात आली आहे.