श्रीमंत संजीवराजेंची चौकशी आज संपणार ?
दैनिक स्थैर्य | दि. ०७ फेब्रुवारी २०२५ | फलटण | सातारा जिल्हा परिषदेचे माजी अध्यक्ष तथा गोविंद मिल्कचे संस्थापक चेअरमन श्रीमंत संजीवराजे नाईक निंबाळकर यांच्या फलटण, पुणे व मुंबई येथील निवासस्थानी आयकर विभागाने केलेली चौकशी सध्या चर्चेचा विषय बनली आहे. या चौकशीचे प्रमुख केंद्र म्हणून श्रीमंत संजीवराजे यांच्या पुणे, सातारा आणि मुंबई येथील निवासस्थानांवर आयकर विभागाची पथके धाडी घालून चौकशी सुरू केली होती.
५ फेब्रुवारी रोजी सकाळी ६ वाजता संजीवराजे नाईक निंबाळकर यांच्या ‘सरोज व्हिला’ या निवासस्थानी आयकर विभागाची पथके आली होती. यावेळी त्यांच्या फलटण, पुणे आणि मुंबई येथील निवासस्थानीही आयकर अधिकाऱ्यांनी धाडी घालून चौकशी सुरू केली होती. ही चौकशी संजीवराजे यांच्या वित्तीय व्यवहारांच्या पारदर्शकतेच्या संदर्भात केली जात असल्याची माहिती समोर येत आहे.
श्रीमंत संजीवराजे नाईक निंबाळकर हे राष्ट्रवादी काँग्रेस पक्ष शरदचंद्र पवार पक्षाशी संबंधित असून, त्यांनी आता झालेल्या विधानसभा निवडणुकीत शरदचंद्र पवार पक्षात प्रवेश केला होता. त्यांचे चुलत बंधू श्रीमंत रामराजे नाईक निंबाळकर हे विधान परिषदेचे माजी सभापती आहेत. या चौकशीमुळे राजकीय वर्तुळातही खळबळ माजली आहे.
श्रीमंत संजीवराजे यांच्या पुणे येथील निवासस्थानी सुरू असलेली आयकर विभागाची चौकशी संपली असून, फलटण येथील निवासस्थानी सुरू असलेली चौकशी सुद्धा आज संपेल अशा चर्चा सध्या फलटण शहरांमध्ये रंगू लागल्या आहेत. आयकर अधिकाऱ्यांनी या चौकशीदरम्यान अनेक महत्त्वाचे दस्तऐवज आणि इलेक्ट्रॉनिक डिव्हाइसेस जप्त केले आहेत, ज्याची तपासणी सुरू आहे.
चौकशीच्या संदर्भात नाईक-निंबाळकर कुटुंबाकडूनही प्रतिक्रिया येत आहे. कुटुंबीयांनी या चौकशीला संयमाने उत्तर दिले आहे, पण आयकर विभागाकडून कोणतेही अधिकृत प्रतिक्रिया नाही. चौकशीच्या निमित्ताने श्रीमंत संजीवराजे यांच्या राजकीय आणि व्यावसायिक कार्याचा आढावा घेतला जात आहे.
