गृहराज्यमंत्र्यांच्या तालुक्यात सात वर्षीय मुलीवर बलात्कार; 48 वर्षीय नराधमाला पाटण पोलिसांकडून अटक
दैनिक स्थैर्य । दि.३१ डिसेंबर २०२१ । पाटण । रवले-सुतारवाडी, ता. पाटण येथे सात वर्षीय अल्पवयीन मुलीवर बलात्कार करून तिचा खून केल्याची संतापजनक घटना घडली आहेत. याप्रकरणी पाटण पोलिसांनी नराधम आरोपींला ताब्यात घेतले असून या घटनेने पाटणसह सातारा जिल्हा आणि राज्यभरात खळबळ उडाली आहे.
संतोष थोरात असे पोलिसांनी याप्रकरणी ताब्यात घेतलेल्या संशयित आरोपीचे नाव आहे. दरम्यान, या घटनेने रवले- सुतारवाडीसह ढेबेवाडी परिसरात तणावाचे वातावरण निर्माण झाले असून त्याठिकाणी पोलीस बंदोबस्त तैनात करण्यात आला आहे.
याबाबत घटनास्थळावरून मिळालेली माहिती अशी की, पाटण तालुक्यातील रवले-सुतारवाडी येथील पीडित मृत अल्पवयीन मुलगी बुधवारी 29 रोजी सायंकाळी बेपत्ता झाली होती. त्यानंतर रात्री उशिरापर्यंत संबंधित मुलीच्या कुटुंबीय, नातेवाईकांनी शोध घेतला. परंतु, ती मिळून आली नाही. गुरुवारी पहाटे 2.30 वाजण्याच्या सुमारास रवले- सुतारवाडी येथे घटनेतील पीडित मृत मुलीच्या घरापासून सुमारे 500 मीटर अंतरावर ओढ्यात तिचा मृतदेह आढळून आला.
याबाबतची माहिती मिळताच ढेबेवाडी, पाटण पोलिसांनी तात्काळ घटनास्थळी धाव घेतली. तसेच गुरुवारी 30 रोजी सकाळी जिल्हा पोलीस प्रमुख अजय कुमार बंसल, गुन्हे प्रकटीकरण शाखेचे किशोर धुमाळ, कराड उपविभागीय पोलिस अधिकारी डॉ. रणजीत पाटील यांनी घटनास्थळी भेट दिली.
दरम्यान, पोलिसांनी संशयित आरोपी संतोष थोरात याला पाटण पोलिसांनी ताब्यात घेतले असून परिसरात तणावपूर्ण वातावरण आहे. या घटनेने ढेबेवाडी परिसरासह पाटण, सातारा जिल्ह्यात खळबळ उडाली आहे.
