तर नगरपालिकेत विरोधक शिल्लक सुद्धा राहणार नाहीत : माजी खासदार रणजितसिंह
दैनिक स्थैर्य | दि. 14 फेब्रुवारी 2025 | फलटण | फलटण शहरातील राजकीय वातावरणात अलीकडे महत्त्वपूर्ण बदल दिसून येत आहेत. माढा लोकसभा मतदारसंघाचे माजी खासदार रणजितसिंह नाईक निंबाळकर यांनी फलटण शहरातील भारतीय जनता पार्टीच्या भविष्याबद्दल आशावाद व्यक्त केला आहे. त्यांनी असा विश्‍वास व्यक्त केला आहे की येणार्‍या नगरपालिका निवडणुकीत भाजपचा दबदबा इतका प्रबळ होईल की विरोधकांना शिल्लक राहण्याची संधी सुद्धा मिळणार नाही.
फलटण शहरातील राजे गटाचे युवा कार्यकर्ते अमोल भोईटे यांनी रणजितसिंह नाईक निंबाळकर यांच्या उपस्थितीत भारतीय जनता पार्टीत प्रवेश केला. या प्रसंगी ज्येष्ठ नेते प्रल्हादराव साळुंखे – पाटील यांच्यासह भाजपचे पदाधिकारी व कार्यकर्ते मोठ्या संख्येने उपस्थित होते. अमोल भोईटे यांनी सांगितले की, “फलटण शहराचा अर्धवट राहिलेला विकास रणजितसिंह नाईक निंबाळकर यांच्या माध्यमातून पूर्ण होईल असा विश्‍वास आहे. विकासाची ही कास धरून त्यात आपलाही वाटा असावा म्हणून आपण भाजपमध्ये प्रवेश केला आहे.”
रणजितसिंह नाईक निंबाळकर यांनी यावेळी सांगितले की, “फलटण शहरात युवकांची ताकद भारतीय जनता पार्टीच्या पाठीमागे उभी राहणे आवश्यक होते. अमोल भोईटे यांच्यासारख्या धडाडीच्या कार्यकर्त्यांच्या रूपाने फलटण शहरातील भाजपमधील ही पोकळी भरून निघाली आहे. मोठे प्रवेश झाले आहेत; आणखीन बाकी आहेत. येणार्‍या नगरपालिका निवडणुकीत जर वॉर्ड २५ च राहिले तर २५ – ० च्या फरकाने भारतीय जनता पार्टी फलटणची नगरपालिका जिंकेल.”
हा प्रवेश फलटण शहरातील भाजपच्या ताकदीत नवीन ऊर्जा आणणार आहे, हे स्पष्ट दिसून येत आहे. रणजितसिंह नाईक निंबाळकर यांच्या नेतृत्वाखाली भाजपचे कार्यकर्ते व पदाधिकारी एकजुटीने काम करून शहराच्या विकासासाठी प्रयत्नशील असतील, हे त्यांच्या भाषणातून दिसून आले.
