“महायुतीचा ‘कणा’ निखळला…”; रणजितदादा भावुक! अजितदादांच्या निधनामुळे आजचे सर्व प्रचार दौरे रद्द

“राज्याचे उपमुख्यमंत्री अजितदादा पवार यांच्या निधनाने मोठा धक्का. माजी खासदार रणजितसिंह नाईक निंबाळकर यांनी वाहिली भावपूर्ण श्रद्धांजली. दुःखाच्या प्रसंगी आज फलटण-कोरेगावमधील सर्व निवडणूक प्रचार कार्यक्रम रद्द केल्याची घोषणा. वाचा सविस्तर…”

स्थैर्य, फलटण, दि. २८ जानेवारी : “राज्याचे उपमुख्यमंत्री आणि विकासाचा महामेरू अजितदादा पवार (Ajit Dada Pawar) यांचे आज झालेल्या विमान अपघातात दुर्दैवी निधन झाल्याची बातमी मनाला चटका लावणारी आणि अतीव दुःख देणारी आहे. त्यांच्या जाण्याने केवळ राष्ट्रवादी काँग्रेस किंवा महायुतीचेच नव्हे, तर संपूर्ण महाराष्ट्राचे कधीही न भरून निघणारे नुकसान झाले आहे. आज आम्ही खंबीर मार्गदर्शक गमावला आहे,” अशा अत्यंत भावूक शब्दांत माजी खासदार रणजितसिंह नाईक निंबाळकर (Ranjitsinh Naik Nimbalkar) यांनी आपल्या संवेदना व्यक्त केल्या.

बारामती येथे झालेल्या विमान अपघातात अजित पवार यांचे निधन झाल्याचे वृत्त समजताच रणजितसिंह नाईक निंबाळकर यांनी तीव्र दुःख व्यक्त केले.

आजचे सर्व प्रचार दौरे आणि कार्यक्रम रद्द

या अत्यंत दुःखद घटनेच्या पार्श्वभूमीवर माजी खासदार रणजितसिंह नाईक निंबाळकर यांनी तातडीने एक महत्त्वाचा निर्णय जाहीर केला. ते म्हणाले, “अजितदादांच्या निधनामुळे आम्ही सर्वजण अत्यंत धक्क्यात आणि दुःखात आहोत. या पार्श्वभूमीवर, फलटण-कोरेगाव विधानसभा मतदारसंघातील जिल्हा परिषद व पंचायत समिती निवडणुकीच्या अनुषंगाने आज भारतीय जनता पार्टी व राष्ट्रवादी काँग्रेस पार्टीचे नियोजित असलेले सर्व प्रचार कार्यक्रम, कोपरा सभा, रॅली आणि दौरे रद्द करण्यात आले आहेत.” सर्व पदाधिकारी आणि कार्यकर्त्यांनी याची नोंद घ्यावी आणि आजचा दिवस आपल्या लाडक्या नेत्याला श्रद्धांजली वाहण्यासाठी समर्पित करावा, असे आवाहन त्यांनी केले.

“स्पष्टवक्ता आणि प्रशासनावर पकड असणारा नेता हरपला”

श्रद्धांजली वाहताना रणजितसिंह पुढे म्हणाले, “अजितदादा हे राजकारणातील एक असे व्यक्तिमत्त्व होते, ज्यांची प्रशासनावर जबरदस्त पकड होती. कामाचा प्रचंड उरक आणि दिलेला शब्द पाळण्याची त्यांची हातोटी विलक्षण होती. सकाळी ६ वाजता कामाला सुरुवात करणारा आणि रात्री उशिरापर्यंत जनतेच्या सेवेत रमणारा असा नेता पुन्हा होणे नाही. फलटण तालुक्याच्या विकासात त्यांचे योगदान आम्ही कधीही विसरू शकणार नाही.”

“महायुतीचा कणा तुटला…”

“गेल्या काही वर्षांत महायुतीमध्ये काम करत असताना दादांचा जो सहवास आणि मार्गदर्शन लाभले, ते माझ्यासाठी मोलाचे होते. कितीही कठीण प्रसंग आला तरी न डगमगता निर्णय घेण्याची त्यांची क्षमता आम्हाला प्रेरणा देत असे. आज त्यांच्या जाण्याने महायुतीचा कणाच तुटला आहे. विकासाच्या प्रश्नांवर राजकारण बाजूला ठेवून मदत करणारा असा दिलदार नेता आज आपल्यात नाही, यावर अजूनही विश्वास बसत नाही,” असे रणजितसिंह यांनी सांगितले.

“हा आघात पचवणे पवार कुटुंबीयांसाठी आणि आम्हा सर्वांसाठी अत्यंत कठीण आहे. ईश्वर अजितदादांच्या आत्म्यास चिरशांती देवो,” अशी प्रार्थना त्यांनी केली.