“फलटणला ‘राजा’ नको, काम करणारा ‘सेवक’ हवा”; रणजितसिंहांचा रामराजेंवर घणाघात; “१२८ कोटींच्या गटार योजनेचे पैसे गेले कुठे?”
स्थैर्य, फलटण, दि. 29 नोव्हेंबर : “फलटण नगरपालिकेची सत्ता ३५ वर्षे रामराजे नाईक निंबाळकर यांच्या हातात होती, पण त्यांनी शहराचे फक्त वाटोळं केले. गटार योजनेचे १२८ कोटी रुपये कुठे गेले? शाळा, दवाखाने बंद पडले आणि सांस्कृतिक भवन उद्ध्वस्त झाले. आता हे पाप झाकण्यासाठी नगरपालिकेत ‘पप्पू’ म्हणून ओळखल्या जाणाऱ्या अनिकेतराजेंना ते ‘राजा’ म्हणून मिरवत आहेत. पण जनतेला आता ‘राजा’ नको, तर काम करणारा ‘सेवक’ हवा आहे,” असा जोरदार हल्लाबोल माजी खासदार रणजितसिंह नाईक निंबाळकर यांनी केला.
फलटण नगरपरिषदेच्या निवडणुकीच्या पार्श्वभूमीवर प्रभाग क्रमांक ९ मध्ये आयोजित महायुतीच्या प्रचार सभेत ते बोलत होते. यावेळी त्यांनी रामराजे नाईक निंबाळकर आणि अनिकेतराजे यांच्यावर सडकून टीका केली.
‘पप्पू’ २० वर्षे पुण्यात आराम करत होता
विरोधकांचे नगराध्यक्षपदाचे उमेदवार अनिकेतराजे यांच्यावर टीका करताना रणजितसिंह म्हणाले, “ज्यांचा उल्लेख ‘पप्पू’ म्हणून केला जातो, ते २० वर्षे पुण्यात आराम करत होते. त्यांना नगरपालिकेचा कारभार माहित नाही. फॉर्म भरल्यावर ते म्हणतात ‘मी फलटणचा राजा आहे’. पण लोकशाहीत नगरसेवक किंवा नगराध्यक्ष हा जनतेचा सेवक असतो. ज्यांना स्वतःच्या वडिलांच्या किंवा काकांच्या प्रभागात कधी फिरकता आले नाही, ते आता शहराचा विकास काय करणार?”
सहकारी संस्थांचे आणि शहराचे वाटोळं
रामराजेंच्या ३५ वर्षांच्या कार्यकाळाचा पंचनामा करताना रणजितसिंह यांनी गंभीर आरोप केले. “मालोजीराजेंच्या नावाने काढलेल्या बँका, कारखाने, दूध संघ, खरेदी-विक्री संघ अशा सर्व संस्थांचे यांनी वाटोळं केले. श्रीराम कारखाना जवाहरला चालवायला दिला, दूध संघाचा लिलाव झाला. इतकेच काय, तर नगरपालिका ३० वर्षे कॉन्ट्रॅक्टरला चालवायला दिली. १२८ कोटी रुपयांची गटार योजना केवळ कागदावरच राहिली, प्रत्यक्षात एकाही घराला गटार जोडले गेले नाही,” असा आरोप त्यांनी केला.
३५ वर्षांचे काम ३५ महिन्यांत करणार
स्वतःच्या कामाचा आलेख मांडताना ते म्हणाले, “गेल्या ५ वर्षांत आम्ही शहरात ७५ कोटींचा रस्ता, नवीन प्रशासकीय भवन, रेल्वे, तारांगण आणि सिटी हॉस्पिटल मंजूर केले. आम्ही २१ हजार महिलांना दिवाळीची भेट दिली. फलटणच्या विकासासाठी समशेरदादांसारखा अनुभवी माणूस नगराध्यक्ष म्हणून हवा आहे. आम्हाला ५ वर्षे संधी द्या. जे काम विरोधकांना ३५ वर्षांत जमले नाही, ते आम्ही ३५ महिन्यांत करून दाखवू, हा माझा शब्द आहे.”
साप आणि काजव्याची गोष्ट
आपल्यावरील टीकेला उत्तर देताना त्यांनी एका कथेचा दाखला दिला. “एका सापाला काजवा विचारतो की तू माझ्या मागे का लागला आहेस? मी तर तुझे अन्न नाही. त्यावर साप म्हणतो, मला तुला चमकताना बघवत नाही. तसेच माझे झाले आहे. मी सामान्य कुटुंबातून पुढे आलो आणि चमकतोय, हे या प्रस्थापित लोकांना बघवत नाही, म्हणून ते मला पाडण्यासाठी एकत्र आले आहेत,” असा टोला त्यांनी लगावला.
लोकसभेला शहराने ७६ टक्के मतदान दिले असून, आता सर्वेनुसार ८२ टक्के लोक आमच्या बाजूने आहेत. त्यामुळे विरोधकांचे डिपॉझिट जप्त होणार, असा विश्वासही त्यांनी यावेळी व्यक्त केला.
