प्रभाग १३ मध्ये राहुल निंबाळकर प्रचारात आघाडीवर ! जुन्या कामांची चर्चा आणि विकासकामे करण्याची तयारी, मतदारांना नवी ‘उमेद’ !
स्थैर्य, फलटण, दि. २० नोव्हेंबर : फलटण नगरपालिका निवडणुकीत प्रभाग क्रमांक १३ मध्ये राष्ट्रवादी काँग्रेस (घड्याळ) पक्षाचे उमेदवार राहुल निंबाळकर हे प्रचारात स्पष्टपणे आघाडीवर असल्याचे दिसत आहेत. राहुल निंबाळकर यांनी आपली प्रचार यंत्रणा अतिशय नियोजनबद्ध पद्धतीने राबवली असून, प्रभागातील नागरिकांकडून त्यांना चांगला प्रतिसाद मिळत आहे. त्यांच्या या प्रगतीचे मुख्य कारण म्हणजे, त्यांनी यापूर्वी विविध कामांमध्ये दिलेले योगदान, याची चर्चा सध्या प्रभागात जोरदार सुरू आहे.
राहुल निंबाळकर यांच्या उमेदवारीमुळे प्रभागातील नागरिकांना एक उत्साही आणि कामाची जाण असलेला प्रतिनिधी मिळण्याची आशा आहे. त्यांच्या कार्यकर्त्यांकडून मतदारांना हेच पटवून दिले जात आहे की, प्रभागातील प्रश्नांची सखोल जाण आणि ती सोडवण्याची क्षमता राहुल निंबाळकर यांच्यात आहे. केवळ आश्वासने न देता, प्रत्यक्ष कामातून बदल घडवण्याची त्यांची तयारी आहे, असा विश्वास त्यांचे समर्थक व्यक्त करत आहेत.
प्रचारादरम्यान राहुल निंबाळकर हे नागरिकांना व्यापक नेतृत्वावर विश्वास ठेवण्याचे आवाहन करत आहेत. ते सांगतात, माजी खासदार रणजितसिंह नाईक निंबाळकर, आमदार सचिन पाटील यांच्या मार्गदर्शनाखाली आणि नगराध्यक्षपदाचे उमेदवार समशेरसिंह नाईक निंबाळकर यांच्या साथीने आपल्याला प्रभागात आणखीन विकासकामे आणि सुविधा निर्माण करायच्या आहेत. फलटण शहराच्या विकासाच्या प्रवाहात प्रभाग १३ ला मागे राहू द्यायचे नाही, अशी साद ते मतदारांना घालत आहेत.
एकंदरीत, प्रभाग क्रमांक १३ मध्ये राहुल निंबाळकर यांनी कामाची पार्श्वभूमी, नेतृत्त्वाची ताकद आणि विकासाचे स्पष्ट व्हिजन या जोरावर आपली बाजू मजबूत केली आहे. जुन्या कामांची पुण्याई आणि नव्या नेतृत्वाची जोड घेऊन राहुल निंबाळकर हे या निवडणुकीत बाजी मारण्याच्या तयारीत आहेत. त्यांच्या या प्रगतीमुळे मतदारांना नवी ‘उमेद’ मिळाली असून, प्रभाग १३ चा निकाल काय लागतो, याकडे साऱ्या फलटणकरांचे लक्ष लागले आहे.
