तहसील आवारातील स्वच्छतागृहाची दुरवस्था; वरिष्ठ अधिकाऱ्यांचे दुर्लक्ष, नागरिकांमधून संताप

स्थैर्य, फलटण, दि. 10 सप्टेंबर : फलटण तहसील कार्यालयाच्या आवारात, नेहमी गजबजलेल्या सेतू कार्यालयाच्या शेजारी असणाऱ्या स्वच्छतागृहाची (मुतारी) अत्यंत दयनीय अवस्था झाली आहे. याच आवारात प्रांताधिकारी आणि तहसीलदारांसारखे वरिष्ठ अधिकारी बसत असतानाही या मूलभूत सुविधेकडे होणारे दुर्लक्ष नागरिकांच्या संतापाचे कारण ठरत आहे.

फलटण तहसील कार्यालयात दररोज तालुक्यातील कानाकोपऱ्यातून हजारो नागरिक आणि महिला विविध शासकीय कामांसाठी येत असतात. मात्र, येथील स्वच्छतागृहात प्रचंड अस्वच्छता पसरली असून, त्याची मोठी दुरवस्था झाली आहे. विशेष म्हणजे, याच परिसरात प्रांताधिकारी कार्यालय, तहसील कार्यालय आहे. असे असतानाही प्रांताधिकारी सौ. प्रियांका आंबेकर, तहसीलदार डॉ. अभिजित जाधव आणि शहराची जबाबदारी असणारे मुख्याधिकारी निखिल मोरे यांचे या गंभीर समस्येकडे लक्ष नसल्याचे चित्र दिसत आहे.

वरिष्ठ अधिकाऱ्यांच्या कार्यालयापासून हाकेच्या अंतरावर असलेल्या स्वच्छतागृहाची ही अवस्था प्रशासनाची एकूणच उदासीनता उघड करत आहे. या अस्वच्छतेमुळे रोगराई पसरण्याची भीती असून, महिलांना याचा सर्वाधिक त्रास सहन करावा लागत आहे. वरिष्ठ अधिकाऱ्यांनी यात तातडीने लक्ष घालून स्वच्छतागृह दुरुस्त करावे आणि त्याची नियमित साफसफाईची सोय लावावी, अशी मागणी जोर धरू लागली आहे.