पोलीस नाईक रेहाना शेख यांनी रमजान ईदचा खर्च टाळून दत्तक विद्यार्थ्यांना दिल्या भेटवस्तू

स्थैर्य, खटाव, दि. 27 : कोरोना संकट काळात 50 विद्यार्थ्यांना दत्तक घेऊन मुंबई पोलीस खात्याच्या इतिहासात सुवर्ण नोंद करणाऱ्या पोलीस नाईक रेहाना शेख (बागवान) यांनी आणखी एक उत्तम कामगिरी केली. पवित्र रमजान ईदच्या दिवशी विद्यार्थ्यांना खाद्यपदार्थ, भेटवस्तू, मास्क, सॅनिटायझर दिले. तसेच विद्यार्थ्यांसाठी शाळेचे शिक्षक ठाकूर यांच्याकडे 10 हजार रुपयांचा धनादेश दिला. यंदाच्या वर्षी ईदचा सर्व खर्च टाळून रेहाना नासिर शेख (बागवान) यांनी व त्यांच्या कुटुंबीयांनी विद्यार्थ्यांना अनोखी भेट दिली.

कोरोना संकटात पोलीस दलातील प्रत्येक जण परिस्थितीवर मात करत कर्तव्य बजावत आहे. कर्तव्य बजावताना आतापर्यंत 15 हून अधिक पोलिसांना वीर मरण आले. कोरोनाच्या संकटात बजावलेल्या कर्तव्याची पोलीस खात्याच्या इतिहासात नोंद होत असताना पोलीस नाईक रेहाना नासिर शेख (बागवान) यांच्या रूपानेही सुवर्ण नोंद झाली.

मुंबईतील नायगव येथे डब्ल्यू 2 कंपनीच्या महिला कारकूनपदी कर्तव्य बजावणाऱ्या पो. ना. रेहाना शेख यांनी मुलीच्या वाढदिवसा दिवशी रायगड जिल्ह्यातील (धामणी, पो. वाजे, ता. पनवेल) ज्ञानाई माध्यमिक विद्यालयातील विद्यार्थ्यांना भेटवस्तू व खाद्यपदार्थ पाठवले. त्यावेळी विद्यार्थ्यांनी व शालेय प्रशासनाने पो. ना. रेहाना शेख यांच्या मुलीला (व्हिडीओद्वारे) शुभेच्छा दिल्या. दरम्यान, या विद्यार्थ्यांचा गरजा, अडचणी व शिक्षणाची जीद्द लक्षात घेऊन रेहाना शेख यांनी 50 विद्यार्थ्यांना दत्तक घेतले.

रमजान ईदचे औचित्य साधून पोलीस नाईक रेहाना नासिर शेख या पती, दोन मुले व बॅचमेट पोलीस नाईक रवींद्र पाटील यांच्यासोबत ज्ञानाई माध्यमिक विद्यालयात गेल्या. या विद्यार्थ्यांसोबत घालवलेला क्षण कायम आठवणीत राहील, अशी प्रतिक्रिया रेहाना नासिर शेख व त्यांच्या मुलांनी व्यक्त केली. उज्ज्वल भारताचे नागरिक घडवण्याचा दृष्टीने रेहाना शेख यांनी घेतलेल्या या निर्णयाचे ज्ञानाई माध्यमिक विद्यालयाच्या वतीने आनंदी दिवकर कोळी शिक्षण प्रसारक संस्थेचे अध्यक्ष महादेवबुवा शहाबाजकर यांनी आभार मानले.

या सर्वाचे श्रेय खऱ्या अर्थाने पोलीस नाईक रवींद्र पाटील यांना जाते. रवींद्र पाटील यांनी शाळेबाबत सांगितल्यामुळेच या विद्यार्थ्यांचे भवितव्य घडवण्याचा निर्णय घेतल्याचे रेहाना नासिर शेख यांना सांगितले.