रोबोटने केले पाहुण्यांचे स्वागत; फलटणमध्ये ५३ वे तालुकास्तरीय विज्ञान प्रदर्शन
फलटणमध्ये ५३व्या तालुकास्तरीय विज्ञान प्रदर्शनाचे डिजिटल उद्घाटन संपन्न. विद्यार्थ्यांनी बनवलेल्या ‘रोबोट’ने केले पाहुण्यांचे स्वागत. आमदार सचिन कांबळे पाटील यांची प्रमुख उपस्थिती.
स्थैर्य, फलटण, दि. 06 डिसेंबर : विद्यार्थ्यांमधील वैज्ञानिक दृष्टिकोन वाढीस लावण्यासाठी फलटण पंचायत समिती शिक्षण विभाग आणि प्रोग्रेसिव्ह कॉन्व्हेंट स्कूल यांच्या संयुक्त विद्यमाने आयोजित ५३व्या तालुकास्तरीय विज्ञान प्रदर्शनाचे शुक्रवारी डिजिटल पद्धतीने उद्घाटन झाले. विशेष म्हणजे, या कार्यक्रमात विद्यार्थ्यांनी तयार केलेल्या ‘रोबोट’ने पाहुण्यांचे आणि मान्यवरांचे स्वागत करून कार्यक्रमाला आधुनिकतेचा स्पर्श दिला. या अनोख्या स्वागताची चर्चा सध्या फलटणमध्ये रंगली आहे.
डिजिटल उद्घाटन आणि विद्यार्थ्यांची कल्पकता
कार्यक्रमाचे उद्घाटन फलटण-कोरेगाव विधानसभा मतदारसंघाचे आमदार सचिन कांबळे पाटील यांच्या हस्ते डिजिटल पद्धतीने करण्यात आले. हे उद्घाटन सोहळा विद्यार्थ्यांच्या नावीन्यपूर्ण कल्पकतेचे उत्तम उदाहरण ठरले. यावेळी प्रोग्रेसिव्ह कॉन्व्हेंट स्कूलच्या विद्यार्थ्यांनी विज्ञानावर आधारित नाटिकेचे आकर्षक सादरीकरण करून उपस्थितांची वाहवा मिळवली.
“शेतकरी हाच खरा वैज्ञानिक”
यावेळी मार्गदर्शन करताना आमदार सचिन कांबळे पाटील यांनी शेती आणि विज्ञानाची सांगड घातली. ते म्हणाले,
“प्रत्येक शेतकरी हा आपल्या शेतीत नवनवीन वैज्ञानिक पद्धतींचा अवलंब करत असतो. विज्ञानाची हीच प्रगती शेतीला आणि देशाला पुढे नेणारी आहे. विद्यार्थ्यांनी पुस्तकी ज्ञानासोबतच प्रत्यक्ष प्रयोगांवर भर द्यावा.”
विज्ञान हे जगण्यासाठी असते
कार्यक्रमाच्या अध्यक्षस्थानावरून बोलताना माजी प्राचार्य रविंद्र येवले यांनी विज्ञानाचे महत्त्व विशद केले.
“विद्यार्थ्यांमध्ये वैज्ञानिक दृष्टिकोन रुजवण्यासाठी अशा प्रदर्शनांचे आयोजन केले जाते. विज्ञान हे फक्त शिकायचे नसते, तर ते प्रत्यक्ष जीवनात अनुभवायचे असते,” असे मत त्यांनी व्यक्त केले.
मान्यवरांची उपस्थिती
या कार्यक्रमाचे प्रास्ताविक गटशिक्षणाधिकारी सी. जी. मठपती यांनी केले. यावेळी जेष्ठ अधिव्याख्याता डॉ. सतिश फरांदे, फलटण एज्युकेशन सोसायटीचे सदस्य रणजित निंबाळकर, सरस्वती शिक्षण संस्थेचे मार्गदर्शक पांडुरंग पवार, जगदिश कदम, कोळकी ग्रामपंचायत सदस्य जयकुमार शिंदे, ज्येष्ठ पत्रकार अरविंद मेहता, गटसमन्वयीका दमयंती कुंभार, व्यवस्थापकीय संचालिका संध्या गायकवाड, प्राचार्या सुजाता गायकवाड यांच्यासह शिक्षण विस्ताराधिकारी, केंद्रप्रमुख आणि शिक्षक मोठ्या संख्येने उपस्थित होते.
कार्यक्रमाच्या शेवटी पाहुण्यांनी प्रदर्शनातील विविध मॉडेल्सची पाहणी करून विद्यार्थ्यांच्या कौशल्याचे कौतुक केले.
