फलटण तालुक्यात पत्रकार दिन साजरा : बिल्डर्स असोसिएशनचा पुढाकार
दैनिक स्थैर्य | दि. ०४ जानेवारी २०२५ | फलटण | फलटण तालुक्यात पत्रकार दिनाचे औचित्य साधून बिल्डर्स असोसिएशन ऑफ इंडिया फलटण सेंटरच्या वतीने एक उत्साही कार्यक्रम आयोजित करण्यात आला. या कार्यक्रमात फलटण शहर व तालुक्यातील अनेक जेष्ठ व युवा पत्रकारांचा सत्कार करण्यात आला.
कार्यक्रमात बिल्डर्स असोसिएशन ऑफ इंडियाचे माजी प्रदेशाध्यक्ष रणधीर भोईटे, संस्थापक अध्यक्ष प्रमोद निंबाळकर, अध्यक्ष किरण दंडिले, लायन भोजराज नाईक निंबाळकर, राजीव नाईक निंबाळकर, महाराष्ट्र पत्रकार कल्याण निधीचे अध्यक्ष रवींद्र बेडकिहाळ, जेष्ठ पत्रकार अरविंद मेहता, रमेश आढाव, मराठी पत्रकार परिषदेचे उपाध्यक्ष युवराज पवार यांच्यासह मोठ्या संख्येने पत्रकार उपस्थित होते.
पत्रकार दिनाच्या औचित्याने आयोजित केलेल्या या कार्यक्रमात, जेष्ठ पत्रकार रवींद्र बेडकिहाळ यांनी एक महत्त्वपूर्ण मनोगत व्यक्त केले. त्यांनी सांगितले की, “बांधकाम व्यावसायिक हे समाजामध्ये घरे बांधून देण्याची कामकाज करीत असतात तर पत्रकार हे समाज बांधण्याचे काम करत असतात. त्यामुळे बांधकाम व्यावसायिक व पत्रकार हे काही वेगळे नाहीत.”
जेष्ठ पत्रकार अरविंद मेहता यांनी फलटण तालुक्यातील पत्रकारांचे विविध प्रश्न मांडले. त्यांनी सांगितले की, “बातमीदार किंवा वार्ताहरांच्या व्यावसायिक दृष्ट्या अनेक समस्या असून सुद्धा ते सामाजिक कार्यात अग्रेसर असतात. सामाजिक प्रश्नांना जर जिल्हा स्तरावर बसलेले संपादक दाद देत नसले तरी सुद्धा ते सामाजिक कार्यांच्या बातम्या प्रकाशित करत असतात.” यावेळी रमेश आढाव यांनीही पत्रकारांच्या विविध समस्या मांडल्या.
रवींद्र बेडकिहाळ यांनी मागणी केली की, “फलटण तालुक्यातील पत्रकारांना हक्काची घरे मिळण्यासाठी बिल्डर्स असोसिएशन ऑफ इंडिया फलटण सेंटरच्या वतीने पुढाकार घेण्यात यावा. यासाठी आवश्यक ती सर्व मदत सर्वच पत्रकार करतील.” या मागणीवर बिल्डर्स असोसिएशन ऑफ इंडियाचे माजी प्रदेशाध्यक्ष रणधीर भोईटे यांनी पत्रकारांच्या हक्काच्या घरासाठी सुद्धा आम्ही नक्की पुढाकार घेणार आहोत.
कार्यक्रमाचे सूत्रसंचालन स्वीकार मेहता यांनी केले. यावेळी बिल्डर्स असोसिएशन ऑफ इंडिया फलटण सेंटरचे अध्यक्ष किरण दंडिले, संस्थापक अध्यक्ष प्रमोद निंबाळकर, रणधीर भोईटे यांनी आपली मनोगते व्यक्त केली.
पत्रकार दिनाच्या औचित्याने आयोजित केलेल्या या कार्यक्रमाने फलटण तालुक्यातील पत्रकारांना एकत्र आणून त्यांच्या समस्यांवर प्रकाश टाकला आणि त्यांच्या हक्काच्या घरासाठी बिल्डर्स असोसिएशनचा पुढाकार घेण्याचे आश्वासन दिले. हा कार्यक्रम समाजातील दोन महत्त्वाच्या वर्गांमधील संबंध मजबूत करण्याच्या दिशेने एक महत्त्वपूर्ण पाऊल आहे.
