“वराती मागून घोडे!” – गळीत हंगामानंतर वजन काटे तपासणीवर स्वाभिमानी शेतकरी संघटनेचा संताप

गळीत हंगाम संपल्यानंतर वजन काट्यांची तपासणी करण्यावर स्वाभिमानी शेतकरी संघटनेची टीका. तालुकाध्यक्ष नितीन यादव यांचा प्रशासनावर निशाणा.

स्थैर्य, फलटण, दि. 21 फेब्रुवारी : संपूर्ण गळीत हंगाम आटोपल्यानंतर प्रशासनाकडून साखर कारखान्यांतील वजन काट्यांची तपासणी सुरू करण्याच्या हालचालींवर स्वाभिमानी शेतकरी संघटनेने तीव्र आक्षेप घेतला आहे. “वराती मागून घोडे — आणि प्रशासन पुढे!” अशा शब्दांत तालुकाध्यक्ष नितीन यादव यांनी प्रशासनावर निशाणा साधला.

यादव म्हणाले, “ऊस आला, तोलला गेला, साखर झाली आणि व्यवहारही पूर्ण झाले. आता गळीत हंगाम संपल्यानंतर वजन काटे तपासण्याचा दिखावा केला जात आहे. जेव्हा शेतकरी काट्यावर उभा होता, तेव्हा अधिकारी कुठे होते?”

हजारो टन ऊस तोलला जात असताना तपासणी का झाली नाही, असा सवाल करत त्यांनी विचारले की, “जर काट्यांमध्ये तफावत आढळली, तर त्या फरकाची भरपाई कोण करणार? शेतकऱ्याला न्याय कसा मिळणार?”

त्यांच्या मते, ही कारवाई शेतकऱ्यांच्या हितासाठी नसून केवळ कागदोपत्री जबाबदारी निभावण्यासाठी आहे. “ज्यावेळी गरज होती, त्यावेळी प्रशासन मौन बाळगत होते. आता हंगाम संपल्यानंतर धाडस दाखवण्याचा प्रयत्न होत आहे,” अशी टीकाही त्यांनी केली.

“शेतकरी मूर्ख नाही. त्याला कळतं — ही पारदर्शकता नाही, ही केवळ औपचारिकता आहे. गळीत सुरू असताना काट्यावर नजर ठेवली असती, तर आज अशी वेळ आली नसती,” असेही यादव यांनी स्पष्ट केले.

दरम्यान, प्रशासनाकडून या विषयावर अधिकृत भूमिका अद्याप स्पष्ट झालेली नाही. मात्र शेतकरी संघटनांच्या आक्रमक भूमिकेमुळे आगामी काळात या प्रश्नावर राजकीय आणि प्रशासकीय पातळीवर वादंग निर्माण होण्याची शक्यता व्यक्त होत आहे.