श्रीराम यात्रेच्या उत्साहात विघ्न! दर्शनासाठी आलेल्यांच्या गाड्यांची तोडफोड; पोलिसांच्या गस्तीची मागणी

• राम मंदिर परिसरात वाहनधारकांना फटका

• दर्शनावरून परतल्यावर गाड्यांचे हॅण्डल तुटलेले आढळले

• पार्किंगच्या समस्येनंतर आता तोडफोडीची धास्ती

स्थैर्य, फलटण, दि. २० नोव्हेंबर : फलटण शहरात सध्या एका बाजूला स्थानिक स्वराज्य संस्थांच्या निवडणुकांचे वारे वाहत आहेत, तर दुसरीकडे ग्रामदैवत प्रभू श्रीरामचंद्र रथोत्सवाचा उत्साह शिगेला पोहोचला आहे. मात्र, या आनंदाच्या वातावरणात वाहनधारकांना आणि भाविकांना एका विचित्र मानसिक त्रासाला सामोरे जावे लागत आहे. राम मंदिर परिसरात दर्शनासाठी पार्क केलेल्या चारचाकी वाहनांची अज्ञातांकडून तोडफोड करण्याचे प्रकार समोर येत आहेत.

नेमका प्रकार काय?

रथोत्सवाच्या निमित्ताने राम मंदिरात रात्री प्रभू रामचंद्राची वाहनमंदिर परिक्रमा आयोजित केली जाते. हा सोहळा पाहण्यासाठी आणि दर्शनासाठी अनेक स्थानिक भाविक आपल्या चारचाकी वाहनाने मंदिर परिसरात येतात. मात्र, दर्शन घेऊन परतल्यावर अनेकांना आपल्या वाहनाचे नुकसान झाल्याचे निदर्शनास येत आहे. विशेषतः वाहनांचे डोअर हॅण्डल (Door Handle) खोडसाळपणे तोडणे किंवा चोरीच्या उद्देशाने त्याचे नुकसान करणे, असे प्रकार घडत आहेत.

गॅरेजवर उघडकीस आला प्रकार

सुरुवातीला ही एकादुसरी घटना असावी असे वाटत होते. मात्र, जेव्हा बाधित वाहनधारक आपल्या वाहनाच्या दुरुस्तीसाठी गॅरेजमध्ये गेले, तेव्हा त्यांना धक्कादायक वास्तव समजले. त्याच वेळी आणि त्याच परिसरातून आलेल्या इतर वाहनधारकांचेही अशाच प्रकारे नुकसान झाले असल्याचे तेथे दिसून आले. यावरून ही केवळ एक चूक नसून खोडसाळ वृत्तीने केलेले कृत्य असल्याचे स्पष्ट होत आहे.

वाहनधारकांमध्ये भीतीचे वातावरण

शहरात आधीच पार्किंग पट्ट्या आणि वाहनतळांवर अतिक्रमणांचा विळखा आहे. त्यामुळे सुरक्षित पार्किंग मिळणे कठीण झाले आहे. त्यातच आता अशा तोडफोडीच्या घटना घडत असल्याने भाविक आणि नागरिक धास्तावले आहेत. इतर कामासाठी किंवा अगदी देवदर्शनासाठी सुद्धा गाडी पार्क करून जावे की नाही, अशी द्विधा मनस्थिती वाहनधारकांची झाली आहे.

पोलिस गस्तीची मागणी

निवडणुकीच्या धामधुमीत आणि यात्रेच्या गर्दीत अशा विकृत प्रवृत्ती फोफावत आहेत. या प्रकारांना आळा घालण्यासाठी पोलीस प्रशासनाने राम मंदिर व गर्दीच्या परिसरात रात्रीची गस्त वाढवावी, अशी मागणी त्रस्त नागरिकांकडून आणि भाविकांकडून होत आहे.