फलटण पालिकेत पुन्हा सत्तेचा ‘धुराळा’; २२ तारखेला होणार उपाध्यक्ष आणि स्वीकृत नगरसेवकाची निवड! कोणाला मिळणार लॉटरी? मुख्याधिकारी निखिल जाधवांनी जाहीर केला कार्यक्रम

फलटण नगरपरिषदेच्या उपाध्यक्षपदाची आणि स्वीकृत नगरसेवकांची निवड प्रक्रिया जाहीर. २२ जानेवारी रोजी होणार विशेष सभा; विषय समित्यांचीही रचना ठरणार. मुख्याधिकारी निखिल जाधव यांनी दिली सविस्तर माहिती. वाचा संपूर्ण वेळापत्रक…

स्थैर्य, फलटण, दि. 20 जानेवारी : फलटण नगरपरिषदेतील सत्तांतरानंतर आता उत्सुकता लागून राहिलेल्या उपाध्यक्षपद आणि स्वीकृत नगरसेवक निवडीचा कार्यक्रम अखेर जाहीर झाला आहे. मुख्याधिकारी निखिल जाधव यांनी दिलेल्या माहितीनुसार, येत्या २२ जानेवारी २०२६ रोजी नगरपरिषदेच्या सभागृहात राजकीय घडामोडींचा ‘हायव्होल्टेज ड्रामा’ रंगणार आहे. याच दिवशी उपाध्यक्षपदाची निवडणूक, स्वीकृत नगरसेवकांची निवड आणि विविध विषय समित्यांची रचना निश्चित केली जाणार असल्याने राजकीय वर्तुळात प्रचंड खळबळ उडाली आहे.

उपाध्यक्षपदासाठी चुरस; दुपारी १ वाजता फैसला!

मुख्याधिकारी निखिल जाधव यांनी जाहीर केलेल्या विशेष सभेच्या विषयपत्रिकेनुसार, नगरपरिषदेच्या सदस्यांमधून उपाध्यक्ष निवडण्यासाठी २२ जानेवारी रोजी निवडणूक प्रक्रिया पार पडणार आहे.

• नामनिर्देशन पत्र स्वीकारणे: सकाळी ११.०० ते दुपारी १२.०० (मुख्याधिकारी यांच्याकडे).

  

• छाननी: दुपारी १२.०० ते १२.१५ (पीठासीन अधिकारी/नगराध्यक्ष).

  

• माघार घेणे: दुपारी १२.१५ ते १२.३० (मुख्याधिकारी).

  

• उपाध्यक्ष पदाची निवडणूक/मतदान: दुपारी १.०० वाजता.

स्वीकृत नगरसेवकांची ‘लॉटरी’ कोणाला?

उपाध्यक्ष निवडीनंतर लगेचच दुपारी २.०० वाजता नामनिर्देशित सदस्य (स्वीकृत नगरसेवक) निवडीची प्रक्रिया पार पडणार आहे. यासाठी पक्ष/गट/आघाडी प्रमुखांना प्रस्तावित सदस्यांचे नामनिर्देशन पत्र जिल्हाधिकारी सातारा यांच्याकडे २१ जानेवारी रोजी (पहिल्या सभेच्या २४ तास अगोदर) सादर करावे लागणार आहेत. २२ तारखेला पीठासीन अधिकारी (नगराध्यक्ष) दुपारी २.०० वाजता या नावांची अधिकृत घोषणा करतील.

विषय समित्या आणि स्थायी समितीची रचना

त्यानंतर दुपारी ३.०० वाजता स्थायी समिती आणि विविध विषय समित्यांच्या सदस्य संख्या निश्चित करून त्यांची रचना केली जाईल. महाराष्ट्र नगरपरिषद अधिनियमानुसार खालील समित्यांचे गठन केले जाणार आहे: १. सार्वजनिक बांधकाम समिती २. शिक्षण, क्रीडा व सांस्कृतिक कार्य समिती ३. स्वच्छता, वैद्यक आणि सार्वजनिक आरोग्य समिती ४. पाणीपुरवठा आणि जलनिस्सारण समिती ५. नियोजन आणि विकास समिती ६. महिला व बालकल्याण समिती ७. मागासवर्गीय दुर्बल घटक कल्याणकारी समिती (विशेष समिती).

तसेच, नवनिर्वाचित उपाध्यक्ष हे कोणत्या समितीचे सभापती राहतील, हे देखील याच सभेत निश्चित करण्यात येणार आहे. स्थायी समितीमध्ये नगराध्यक्ष (सभापती), सर्व विषय समित्यांचे सभापती आणि पालिकेतील ३ सदस्य यांचा समावेश असेल.

या महत्त्वपूर्ण निवडींमुळे २२ जानेवारीचा दिवस फलटणच्या राजकारणासाठी अत्यंत निर्णायक ठरणार आहे.