फलटण: स्वीकृत नगरसेवकपदासाठी चुरस; ‘या’ नावांची जोरदार चर्चा
फलटण नगरपरिषदेत स्वीकृत नगरसेवकपदासाठी खासदार आणि राजे गटात चुरस निर्माण झाली आहे. अशोकराव जाधव, अनिकेतराजे यांच्यासह अनेक नावे चर्चेत असल्याने उत्सुकता वाढली आहे.
स्थैर्य, फलटण, दि. ०२ जानेवारी : फलटण नगरपरिषदेची निवडणूक प्रक्रिया पार पडल्यानंतर आता सर्वांचे लक्ष स्वीकृत नगरसेवक निवडीकडे लागले आहे. पालिकेतील संख्याबळानुसार सत्ताधारी खासदार गटाला दोन, तर विरोधी राजे गटाला एका जागेवर संधी मिळणार आहे. या तीन जागांसाठी दोन्ही गटांतून दिग्गजांची नावे चर्चेत असून, नक्की कुणाची वर्णी लागणार याकडे संपूर्ण शहराचे लक्ष लागून राहिले आहे.
सत्ताधारी खासदार गटात ‘हे’ दावेदार आघाडीवर
नुकत्याच झालेल्या निवडणुकीत बहुमत मिळवून सत्तेत आलेल्या खासदार गटाकडे स्वीकृत नगरसेवकपदाच्या दोन जागा आहेत. या जागांवर ज्येष्ठ आणि अनुभवी कार्यकर्त्यांची वर्णी लावण्यासाठी चुरस बघायला मिळत आहे. सध्या राजकीय वर्तुळात अशोकराव जाधव, मिलिंद (अप्पा) नेवसे आणि सुदाम (अप्पा) मांढरे यांची नावे आघाडीवर आहेत. खासदार रणजितसिंह नाईक निंबाळकर कुणाच्या गळ्यात माळ घालणार, हे पाहणे औत्सुक्याचे ठरेल.
राजे गटात एका जागेसाठी अनेक इच्छूक
विरोधी बाकावर बसणाऱ्या राजे गटाच्या वाट्याला स्वीकृतची एक जागा येणार आहे. मात्र, या एका जागेसाठी इच्छुकांची यादी मोठी आहे. यामध्ये युवराज श्रीमंत अनिकेतराजे नाईक निंबाळकर यांचे नाव सर्वात आघाडीवर आहे. त्यांच्यासोबतच नितीन भोसले, भाऊसाहेब कापसे, सनी शिंदे आणि दीपक कुंभार यांचीही नावे चर्चेत आहेत.
सत्ताधारी गटातील दोन जागांसाठी तीन प्रबळ दावेदार आणि विरोधी गटातील एका जागेसाठी पाच इच्छूक अशी स्थिती निर्माण झाली आहे. त्यामुळे दोन्ही गटांचे नेतृत्व निष्ठावंतांना संधी देणार की सामाजिक समीकरणे जुळवणार, यावर या निवडी अवलंबून असतील. लवकरच या नावांवर शिक्कामोर्तब होण्याची शक्यता आहे.
