ब्रेकिंग: ‘स्थैर्य’चं वृत्त तंतोतंत खरं! फलटण-महाबळेश्वर पालिकेची निवडणूक लांबणीवरच; २० डिसेंबरला होणार मतदान; आयोगाचा अधिकृत आदेश जारी
स्थैर्य, फलटण, दि. 29 नोव्हेंबर : फलटण आणि महाबळेश्वर नगरपरिषदेच्या निवडणुका तांत्रिक कारणामुळे पुढे जाणार असल्याचे वृत्त ‘स्थैर्य’ने कालच दिले होते. हे वृत्त आज तंतोतंत खरे ठरले आहे. राज्य निवडणूक आयोगाचे सचिव सुरेश काकाणी यांनी आज (दि. २९) सुधारित निवडणूक कार्यक्रम जाहीर केला असून, त्यानुसार आता या निवडणुकांसाठी २० डिसेंबर २०२५ रोजी मतदान होणार आहे.
गेल्या दोन दिवसांपासून निवडणूक पुढे जाणार की नाही, याबाबत उलटसुलट चर्चा आणि अफवांचे पीक आले होते. मात्र, आयोगाच्या आदेशामुळे आता सर्व संभ्रम दूर झाला आहे.
निवडणूक का पुढे गेली? (नेमके कारण)
राज्य निवडणूक आयोगाच्या आदेशानुसार, उमेदवारी अर्जांच्या छाननीनंतर दाखल झालेल्या अपीलांवर जिल्हा न्यायालयाने दि. २२/११/२०२५ पर्यंत निकाल देणे अपेक्षित होते. मात्र, काही ठिकाणी हे निकाल २३/११/२०२५ किंवा त्यानंतर लागले आहेत. नियमानुसार उमेदवारांना अर्ज माघारी घेण्यासाठी ३ दिवसांचा कालावधी मिळणे आवश्यक होते, जो मिळाला नाही. त्यामुळे नैसर्गिक न्यायाच्या दृष्टीने आणि उच्च न्यायालयाच्या निर्देशानुसार आयोगाने निवडणूक प्रक्रियेला स्थगिती देत सुधारित वेळापत्रक जाहीर केले आहे.
नगराध्यक्ष पदासह संपूर्ण निवडणूक स्थगित
आयोगाने स्पष्ट केले आहे की, ज्या प्रकरणात अध्यक्ष (नगराध्यक्ष) पदाचा समावेश आहे, त्या संपूर्ण नगरपरिषदेची निवडणूक स्थगित करण्यात आली असून, आता ती वरील नवीन वेळापत्रकानुसार पार पडेल. त्यामुळे फलटण आणि महाबळेश्वरमधील उमेदवारांना आता प्रचारासाठी अतिरिक्त वेळ मिळाला असला तरी, अर्ज माघारी घेण्याच्या प्रक्रियेकडे सर्वांचे लक्ष लागणार आहे.
