फलटण महिला डॉक्टर आत्महत्या प्रकरण: संशयित आरोपीच्या पोलीस कोठडीत ३० ऑक्टोबरपर्यंत वाढ
स्थैर्य, फलटण, दि. २९ ऑक्टोबर : फलटण उपजिल्हा रुग्णालयातील एका महिला वैद्यकीय अधिकाऱ्याने हॉटेलमध्ये आत्महत्या केल्याच्या धक्कादायक प्रकरणी अटक करण्यात आलेल्या संशयित आरोपीच्या पोलीस कोठडीत वाढ करण्यात आली आहे. फलटण येथील न्यायालयाने संशयित आरोपीला दि. ३० ऑक्टोबरपर्यंत पोलीस कोठडी सुनावली आहे. या प्रकरणाचा तपास आता उपविभागीय पोलीस अधिकारी स्वतः करत आहेत.
दिनांक २३ ऑक्टोबर २०२५ रोजी फलटण शहरातील मधुदीप हॉटेल येथील एका खोलीमध्ये उपजिल्हा रुग्णालयात कार्यरत असलेल्या महिला वैद्यकीय अधिकाऱ्याने आत्महत्या केल्याची घटना उघडकीस आली होती. या घटनेने संपूर्ण सातारा जिल्ह्यात खळबळ उडाली होती. याप्रकरणी फलटण शहर पोलीस स्टेशनमध्ये गुन्हा रजिस्टर नंबर ३४५/२०२५ अन्वये भारतीय दंड विधान कलम ३०६ (आत्महत्येस प्रवृत्त करणे) आणि ३७६ (२) (एम) (पोलीस अधिकाऱ्याने बलात्कार करणे) नुसार गुन्हा दाखल करण्यात आला आहे.
या गुन्ह्याच्या अनुषंगाने, पोलिसांनी संशयित आरोपी प्रशांत किसन बनकर (वय २९, रा. बनकर निवास, लक्ष्मीनगर, फलटण) याला दि. २५ ऑक्टोबर रोजी अटक केली होती. अटक केल्यानंतर त्याला न्यायालयासमोर हजर केले असता, न्यायालयाने त्याला दि. २८ ऑक्टोबरपर्यंत पोलीस कोठडी सुनावली होती.
मंगळवारी, दि. २८ ऑक्टोबर रोजी पोलीस कोठडीची मुदत संपल्याने, संशयित आरोपीला पुन्हा रिमांडसाठी फलटण न्यायालयात हजर करण्यात आले. गुन्ह्याच्या सखोल तपासासाठी पोलीस कोठडी वाढवून मिळण्याची विनंती पोलिसांनी न्यायालयाकडे केली.
न्यायालयाने ही विनंती मान्य करत, संशयित आरोपी प्रशांत बनकर याच्या पोलीस कोठडीत दि. ३० ऑक्टोबर २०२५ पर्यंत वाढ करण्याचे आदेश दिले आहेत.
या गंभीर गुन्ह्याचा पुढील तपास फलटण विभागाचे उपविभागीय पोलीस अधिकारी श्री. विशाल खांबे हे स्वतः करत आहेत.
