फलटणमध्ये विश्वासघात! भावासारखे राहणाऱ्या तरुणाने मायलेकींचे एटीएम कार्ड वापरून हडपले अडीच लाख रुपये; पोलिसांत गुन्हा दाखल
फलटण शहरात घरात भावासारखे राहणाऱ्या एका तरुणाने मायलेकींचा विश्वास संपादन करून त्यांच्या एटीएम कार्डद्वारे तब्बल २ लाख ३५ हजार ४४१ रुपयांची फसवणूक केल्याचा धक्कादायक प्रकार उघडकीस आला आहे. याप्रकरणी शहर पोलीस ठाण्यात गुन्हा दाखल करण्यात आला आहे.
स्थैर्य, फलटण, दि. 3 मार्च : घरात भावासारखे राहणाऱ्या आणि घरकामात मदत करणाऱ्या एका तरुणाने घरातील मायलेकींचा विश्वास संपादन करून त्यांच्या एटीएम (ATM) कार्डचा गैरवापर करत तब्बल २ लाख ३५ हजार ४४१ रुपयांची आर्थिक फसवणूक केल्याचा धक्कादायक प्रकार फलटण शहरात उघडकीस आला आहे. याप्रकरणी फसवणूक झालेल्या महिलेने दिलेल्या फिर्यादीनुसार एका तरुणावर फलटण शहर पोलीस ठाण्यात विश्वासघाताचा गुन्हा दाखल करण्यात आला आहे.
आईच्या खात्यातून काढले १ लाखांहून अधिक रुपये
पोलिसांनी दिलेल्या माहितीनुसार, तक्रारदार महिला या फलटण शहरातील शुक्रवार पेठेत राहतात. त्यांच्या घरात वाठार निंबाळकर (ता. फलटण) येथील एक तरुण २००६ ते २०२० या काळात भावासारखा राहत होता. घरातील कामात तो मदत करत असल्याने महिलेने त्यांच्या आयडीबीआय (IDBI) बँकेच्या खात्याचे एटीएम कार्ड त्याच्याकडे विश्वासाने दिले होते व गरजेनुसार पैसे काढण्यास सांगितले होते.
मात्र, या विश्वासाचा गैरफायदा घेत या तरुणाने नोव्हेंबर २०१२ ते सप्टेंबर २०१३ या कालावधीत वेळोवेळी परस्पर एकूण २ लाख ३८ हजार ९२० रुपये काढून घेतले. २०२० मध्ये तो तरुण घर सोडून गेल्यानंतर हा प्रकार महिलेच्या लक्षात आला. याबाबत त्याला जाब विचारला असता, त्याने आपली चूक मान्य करत १ लाख ३५ हजार ७६८ रुपये खात्यात परत जमा केले. मात्र, उर्वरित १ लाख ३ हजार १५२ रुपये देण्यास त्याने स्पष्ट नकार दिला.
मुलीचेही सव्वा लाख रुपये हडपले
याच तरुणाने तक्रारदार महिलेच्या मुलीच्याही विश्वासाचा असाच गैरफायदा घेतला. मुलीचे देखील आयडीबीआय (IDBI) बँकेत खाते होते आणि तिचे एटीएम कार्डही या तरुणाकडे विश्वासाने देण्यात आले होते. त्याने या कार्डचाही गैरवापर करून मे २०१७ ते जुलै २०१७ या कालावधीत मुलीच्या खात्यातून वेळोवेळी एकूण १ लाख ३२ हजार २८९ रुपये परस्पर काढून घेतले.
अशा प्रकारे या तरुणाने मायलेकींच्या एटीएम कार्डचा गैरवापर करून एकूण २ लाख ३५ हजार ४४१ रुपयांची रोकड हडपून मोठा विश्वासघात केला आहे. पैसे परत मागितले असता त्याने ते देण्यास टाळाटाळ करून नकार दिल्याने, अखेर या फसवणुकीबाबत फलटण शहर पोलीस ठाण्यात तक्रार दाखल करण्यात आली असून पोलिसांनी गुन्हा नोंद केला आहे.
