बदला घेण्यासाठी इन्स्टाग्रामवर खोटे अकाउंट उघडून रचला ‘हनी ट्रॅप’! गोखळी येथील नीरा नदीतील मृतदेह प्रकरणाचा थरारक उलगडा; पिंप्रद येथील एकाच कुटुंबातील चौघांना अटक
गोखळी (ता. फलटण) येथील नीरा नदीच्या पात्रात मिळालेल्या अंकुश नरबट (रा. ढाकणी, ता. माण) याच्या मृतदेह प्रकरणाचा फलटण ग्रामीण पोलिसांनी उलगडा केला आहे. कुटुंबातील मुलीवर झालेल्या अत्याचाराचा बदला घेण्यासाठी इन्स्टाग्रामवर बनावट अकाउंट उघडून त्याला प्रेमाच्या जाळ्यात ओढून खून केल्याचे तपासात निष्पन्न झाले असून चौघांना अटक केली आहे.
स्थैर्य, फलटण, दि. २८ फेब्रुवारी : माण तालुक्यातील एका तरुणाला इन्स्टाग्रामवर (Instagram) खोटे अकाउंट उघडून प्रेमाच्या जाळ्यात ओढायचे, त्याला भेटायला फलटणला बोलावून निर्जनस्थळी न्यायचे आणि तिथे निर्घृण खून करून त्याचा मृतदेह नीरा नदीत फेकून द्यायचा, असा एखाद्या चित्रपटाला लाजवेल असा थरारक कट फलटण ग्रामीण पोलिसांनी उधळून लावला आहे. गोखळी (ता. फलटण) गावच्या हद्दीत नीरा नदीत मिळालेल्या मृतदेह प्रकरणी पोलिसांनी गुन्ह्याची उकल केली असून, एकाच कुटुंबातील ४ जणांना अटक केली आहे.
दि. १७ फेब्रुवारी २०२६ रोजी सायंकाळी ६ वाजण्याच्या सुमारास गोखळी (ता. फलटण) गावच्या हद्दीत नीरा नदीच्या पात्रात एका अनोळखी पुरुषाचे प्रेत तरंगताना ग्रामस्थांना आढळले होते. पोलिसांनी या प्रकरणाचा तपास सुरू केला असता, हा मृतदेह अंकुश बापू नरबट (वय २२ वर्षे, रा. ढाकणी, ता. माण, जि. सातारा) याचा असल्याचे निष्पन्न झाले होते.
माण तालुक्यात राहणाऱ्या तरुणाचा मृतदेह फलटणमध्ये कसा आला आणि त्याच्या डोक्यावर जखमा कशा? यावरून पोलिसांचा संशय बळावला. मयत तरुण स्त्रीलंपट असल्याची गोपनीय माहिती मिळाल्यानंतर पोलिसांनी तांत्रिक तपासाला गती दिली.
अत्याचाराचा बदला घेण्यासाठी रचला ‘हनी ट्रॅप’चा कट
तपासाअंती या खुनाचे धक्कादायक कारण समोर आले. मयत अंकुश नरबट याने आरोपींच्या कुटुंबातील एका मुलीबाबत अत्याचाराचा प्रकार केला होता. मात्र, आरोपींनी आपल्या कुटुंबाची बदनामी टाळण्यासाठी आणि खोट्या प्रतिष्ठेपायी याची कुठेही वाच्यता न करता, त्याचा थेट काटा काढण्याचा (खून करण्याचा) कट रचला.
यासाठी आरोपींनी एका स्त्रीच्या नावाने इन्स्टाग्रामवर एक बनावट (Fake) अकाउंट उघडले आणि मयत अंकुशला प्रेमाच्या जाळ्यात ओढून भेटण्यासाठी फलटणला बोलावले.
असा घडवून आणला खून:
- दि. १५ फेब्रुवारी रोजी दुपारी १२ वाजता मयत अंकुश हा फलटणला आला.
- त्यानंतर आरोपींपैकी एका महिलेने त्याला एकांतात वेळ घालवण्याच्या बहाण्याने तातमगिरी डोंगराच्या पायथ्याला असलेल्या निर्जनस्थळी नेले.
- तिथे गेल्यानंतर पूर्वनियोजनानुसार इतर चार आरोपी वेगवेगळ्या वाहनांतून तिथे पोहोचले.
- त्यांनी अंकुशला लाथाबुक्क्यांनी बेदम मारहाण केली आणि त्याला चारचाकी वाहनातून पिंप्रद (ता. फलटण) गावच्या हद्दीत दुसऱ्या निर्जनस्थळी नेले.
- तिथे त्याचा खून करण्यात आला आणि पुरावा नष्ट करण्याच्या उद्देशाने त्याचा मृतदेह गोखळी हद्दीत नीरा नदीच्या पात्रात फेकून देण्यात आला.
अटक करण्यात आलेले आरोपी:
याप्रकरणी फलटण ग्रामीण पोलीस ठाण्यात गु.र.नं. ११९/२०२६ अन्वये भारतीय न्याय संहिता (BNS) २०२३ चे कलम १०३(१), १४०(१), २३८, ६१, ३(५) नुसार खुनाचा गुन्हा दाखल करण्यात आला असून खालील ४ आरोपींना अटक करण्यात आली आहे:
१. आविष्कार ज्ञानेश्वर भगत
२. श्रद्धा आविष्कार भगत
३. ज्ञानेश्वर भरतराव भगत
४. अर्चना ज्ञानेश्वर भगत (सर्व रा. पिंप्रद, ता. फलटण, जि. सातारा)
सीसीटीव्ही आणि तांत्रिक तपासातून लागला छडा
आरोपींनी अत्यंत थंड डोक्याने हा कट रचला होता. सुरुवातीला पोलिसांकडे कोणतेही धागेदोरे नव्हते. मात्र, पोलिसांनी अत्यंत मेहनतीने फलटण ते दहिवडी रोडवरील सर्व हॉटेल्स, दुध डेअरी आणि पेट्रोलपंप येथील सीसीटीव्ही (CCTV) कॅमेरे तपासले. तसेच, आरोपी आणि मयत यांचे मोबाईल नंबर आणि तांत्रिक माहिती प्राप्त करून, पुराव्यांची साखळी जोडत या अंधाऱ्या गुन्ह्याची उकल केली.
सदरची उल्लेखनीय कारवाई सातारा पोलीस अधीक्षक मा. तुषार दोशी, अपर पोलीस अधीक्षक मा. वैशाली कडुकर, उपविभागीय पोलीस अधिकारी मा. विशाल खांबे यांच्या मार्गदर्शनाखाली पोलीस निरीक्षक संदीप जगताप यांच्या नेतृत्वात करण्यात आली. गुन्हे प्रकटीकरण विभागाचे पोलीस उपनिरीक्षक दिपक ज्ञानदेव पवार (जे या गुन्ह्याचा पुढील तपास करत आहेत), पोलीस अंमलदार नितीन चतुरे, अमोल जगदाळे, श्रीनाथ कदम, वैभव सूर्यवंशी, हणमंत दडस यांनी या कारवाईत सहभाग घेतला.
