श्रीराम साखर कारखाना बायपासवर ‘ड्रंक अँड ड्राईव्ह’ची धडक कारवाई! मद्यधुंद अवस्थेत दुचाकी चालवणाऱ्या तिघांवर गुन्हे दाखल

फलटण शहर वाहतूक पोलिसांनी श्रीराम साखर कारखाना बायपास रोडवर मद्यप्राशन करून दुचाकी चालवणाऱ्या तीन जणांवर मोटार वाहन कायद्यांतर्गत कारवाई केली आहे. ब्रेथ ॲनालायझरद्वारे तपासणी करत पोलिसांनी हे गुन्हे नोंदवले आहेत.

स्थैर्य, फलटण, दि. १० मार्च : फलटण शहरात वाहतूक नियमांचे उल्लंघन करणाऱ्यांवर आणि मद्यप्राशन करून वाहने चालवणाऱ्यांवर पोलिसांनी कारवाईचा बडगा उगारला आहे. रविवारी (दि. ८ मार्च) रात्रीच्या सुमारास श्रीराम साखर कारखाना बायपास रोडवर केलेल्या धडक कारवाईत, मद्यधुंद अवस्थेत वेडीवाकडी दुचाकी चालवून स्वतःचा व इतरांचा जीव धोक्यात घालणाऱ्या तीन वेगवेगळ्या चालकांवर गुन्हे दाखल करण्यात आले आहेत.

पोलिसांनी दिलेल्या माहितीनुसार, ड्युटीवर असलेल्या वाहतूक पोलिसांच्या पथकांनी ‘ब्रेथ ॲनालायझर’ मशीनच्या साहाय्याने तपासणी करून या कारवाया केल्या आहेत.

पहिली कारवाई: सोमंथळीच्या २५ वर्षीय तरुणावर गुन्हा

पहिली कारवाई रविवारी सायंकाळी ७.५५ वाजण्याच्या सुमारास श्रीराम साखर कारखाना बायपास रोडवर करण्यात आली. पोलीस कॉन्स्टेबल संभाजी जगताप हे त्यांच्या सहकाऱ्यांसोबत ड्युटीवर असताना एक २५ वर्षीय तरुण (रा. सोमंथळी, ता. फलटण) आपली स्प्लेंडर दुचाकी (क्र. MH-11 W 71) रस्त्यावर वेडीवाकडी चालवताना आढळून आला. पोलिसांनी त्याला थांबवून ब्रेथ ॲनालायझरद्वारे तपासणी केली असता, त्याच्या शरीरात तब्बल २०६ mg/१०० ml इतके दारूचे प्रमाण आढळून आले.

दुसरी कारवाई: ३७ वर्षीय दुचाकीस्वार सापडला

दुसरी कारवाई पोलीस कॉन्स्टेबल पांडुरंग धायगुडे आणि त्यांच्या सहकाऱ्यांनी रात्री सव्वाआठ (२०.१७) वाजण्याच्या सुमारास याच बायपासवर केली. एक ३७ वर्षीय दुचाकीस्वार (रा. विडणी अभंगमळा, ता. फलटण) आपली बजाज दुचाकी (क्र. MH 11 V 5299) धोकादायक स्थितीत चालवत होता. त्याची तपासणी केली असता दारूचे प्रमाण २६ mg/१०० ml असल्याचे निष्पन्न झाले.

तिसरी कारवाई: २५६ mg/१०० ml दारूचे धक्कादायक प्रमाण

तिसरी कारवाई याच बायपास परिसरात काही वेळातच, म्हणजेच रात्री ८.२८ वाजता करण्यात आली. एक ३९ वर्षीय व्यक्ती (रा. कसबा पेठ, फलटण) पॅशन प्रो दुचाकीवरून (क्र. MH 11 BY 5085) जात असताना पोलीस कॉन्स्टेबल ऋषिकेश खरात आणि त्यांच्या सहकाऱ्यांनी त्याला थांबवून तपासले. या व्यक्तीने मोठ्या प्रमाणावर मद्यपान केल्याचे ब्रेथ ॲनालायझर मशीनवर उघड झाले. त्याच्या शरीरात तब्बल २५६ mg/१०० ml इतके धक्कादायक दारूचे प्रमाण आढळून आले.

तिघांवरही मोटार वाहन कायद्यांतर्गत कारवाई

अडखळत व बोबड्या भाषेत बोलणे, डोळे तारवटलेले असणे आणि तोंडातून दारूचा उग्र वास येणे, अशा मद्यधुंद अवस्थेत हे तिन्ही दुचाकीस्वार आढळून आले. याप्रकरणी पोलीस कॉन्स्टेबल जगताप, धायगुडे आणि खरात यांच्या फिर्यादीवरून, या तिघांविरुद्ध फलटण शहर पोलीस ठाण्यात मोटार वाहन कायदा कलम १८५ प्रमाणे सरकारतर्फे कायदेशीर गुन्हे दाखल करण्यात आले आहेत.